لکھاری: ناہید مہدی
سوشل میڈیا تے اک توں ودھ اک نمونہ لبھدا اے تے صحافیاں وچ اوس توں وی ودھ ان پڑھ بیٹھے نیں۔ ہنے تھوڑی دیر پہلوں اک پنج جماعتاں پاس ڈائریکٹ صحافی نے لکھیا اے بئی نیوزی لینڈ دی وزیر اعظم ولوں دوپٹہ لین تے زنانیاں دے مارچ کرن والی زنانیاں نوں شرم کرنا چاہیدی اے۔
ایہہ صاحب فرماؤندے نیں بئی زنانیاں دے مارچ وچ دوپٹے توں بغیر جیہڑیاں زنانیاں رلیاں سن اوہ این جی اوز کولوں تنخواہواں لیندیاں نیں تے اوہ بے شرم نیں۔ تے وزیر اعظم جیسنڈا نے دوپٹہ لے کے اپنے پاک کردار دا وکھالا کیتا اے۔
ایس صحافی نوں بندہ کیہ آکھے۔ پہلی گل اے بئی وزیر اعظم جیسنڈا نے دوپٹہ کوئی پکا ای نہیں لے لیا۔تے نہ ای اوہ ایہہ دوپٹہ لے کے وزیر اعظم ہاوس جاون گیاں۔ جیہڑے جذبے نال اوہ دوپٹہ لے کے مسلماناں دے گھر گئیاں اوس جذبے دی سلاہنا کیتی جانی چاہیدی اے۔ دکھ دی ایس گھڑی وچ وزیر اعظم جیسنڈا نے جس طرح حوصلہ دتا تے خبر گیری کیتی نالے غم نال ترٹے لوکاں دے ساہمے سر کج کے آئی اوہ سلاہن جوگا اے۔
دوجے پاسے جیہڑے پچھل پیرے لوک جیسنڈا دا فوٹو چک کے بھنگڑے پا رہئے تے پاکستان دیاں زنانیاں نوں چھبیاں دی رہئے نیں اوہناں دی اطلاع لئی دس رہئی آں بئی بوہتے سماجاں وچ مرن یا سوگ اتے زنانیاں سر کج کے جاندیاں نیں۔
بوہتیاں زنانیاں کالے لیڑے پا کے جاندیاں نیں تے سر نوں ٹوپی، دوپٹے سکارف یاں نقاب نال کج دیاں نیں۔
ہن اوہ لوک جیہڑے زنانیاں دے مارچ اتے ٹپ ٹپ کے دوپٹہ نہ لین والی پاکستانی زنانیاں نوں ملک چھڈن دیاں صلاحواں دیندے پئے نیں اوہناں نوں سوچنا چاہیدا اے بئی اوہ سب کجھ نا سمجھی پاروں کر دے پئے نیں۔
جہیڑے لوک زنانیاں نوں گاہلاں کڈ رہئے نیں اوہناں نوں سوچنا چاہیدا اے بئی جیویں دیاں گاہلاں مرد کڈھ دی نیں جے ایہو جئیاں گاہلاں اگلے روھے دے مارچ وچ زنانیاں نے کڈھنا چھو دتیاں تے ایہہ کس نوں منہ وکھاون جوگے رہ جاون گے۔
ساڈے لوکاں نوں ایہہ دھیان وچ رکھنا چاہیدے اے بئی وزیر اعظم جیسنڈا اپنے بوائے فرینڈ نال رہندیاں نیں تے اجے تائیں اوہناں ویاہ نہین کیتا۔ اوہ ویاہیاں بنا ای اک کڑی دی ماں بنیاں نیں۔ ایس توں ودھ کے ایہہ گل بئی اوہناں نے اپنے ماں پیو ولوں ملیا رومن کیتھولک مذہب ایس لئی چھڈ دتا کیونجو اوہ اپنے مذہب نوں اپنے وچاراں توں الٹ سمجھ دے سن۔ وزیر اعظم جیسنڈا زنانیاں دے زنانیاں تے مرداں دے مرداں نال ویاہ دی مخالف نہیں پر اوہناں دا مذہب ایس کا مخالف سی۔ جیسنڈا نے اپنے وچاراں اتے اپنے مذہب دی قربانی دتی کیونجو اوہناں دی نظر وچ ایہہ انسانیت دی حمائت اے۔ اوہ کسے ایسے مذہب یا نظریئے دی مخالف نیں جیہڑا بندے دے ذاتی معاملیاں وچ لٹ اڑاوے تے سارے سماج نوں اوس دیاں بیڑیاں وچ بنھ دیوے۔
جیہڑے لوک بوہتا ٹپ رہئے نیں اوہ دھیان کرن بئی کدھرے سدھراں دی لہر وچ اوہ جیسنڈا نوں مسلمان نہ بنا کے پیش کر دیون۔
ہر شے نوں مذہب دی عینک نال ویکھن والیاں لئی میں ایہہ گل دسنا ضروری سمجھیا۔ نیوزی لینڈ دی وزیر اعظم تے اوتھوں دے بوہتے لوک اعلی انسانی قدراں نوں ساریاں گلاں تو ودھ سمجھدے نیں تے کسے مذہب نوں وی ایس دی اجازت نہیں دیندے بئی کسے دی جان لے لتی جاوے۔
کجھ فوٹواں جنہاں وچ جیکی کینڈی اپنے جنے دے جنازے وچ، ملک برطانیہ لیڈی ڈیانا دے جنازے وچ تے ملکہ برطانیہ اوہناں دی ماں تے اوہناں دی دادی گھنڈھ کڈھ کے جنازے وچ رلے ہوئے نیں۔
721
