1,681

پنجاب دی سوچ دا دوجا پکھ

لکھاری: اسلم ڈوگر

پنجاب جیہڑا پاکستان بنن ویلے دنیا دی اک وڈی ہجرت تے قتل عام دا پڑ بنیا سی تے پاکستان بنن مگروں لہندے پنجاب نوں تھوڑے سال امن دے مل گئے۔ ایہہ امن تے چلدیا تے رہیا پر پنجابی قوم نے ایس امن دا وڈا مل اتاریا۔پنجاب دے اتے اردو دا لدا لد دتا گیا تے ایہہ آکھیا گیا بئی اردو پاکستان دی زبان تے ہووے گی ای سگوں ایہہ مسلماناں دی بولی ہووے گی۔ پنجاب اپنی زبان بھل گیا تے پنجابی زبان لکھن پڑھن وچ نظر آنا بند ہو ئی۔ جیہڑی زبان بولی جاندی اے اوس وچ وی اردو دا ایناں رلا ہو گیا کہ لوک پنجابیاں نوں اردو تے اردو نوں پنجاب دی رہتل سمجھن لگ گئے۔

جدوں بنگالیاں اتے اردو نازل کیتی گئی تے اوہناں سمجھیا بئی پنجاب اپنی زبان اوہناں اتے اپنی بولی لاون لگا اے۔ ایس اردو پاروں بنگالی لوک لہندے پاکستان نوں پنجاب سمجھن لگ پئے۔ چلو بنگالی وکھ ہو گئے پر گل پھیر وی نہ مکی۔ لہندے پاکستان دے پچھے بچ جاون والے صوبے ایہہ سمجھن لگ پئے بئی اردو پنجاب دی زبان اے۔ ایہہ صوبے کوئی ایڈے غلط وی نہین سن کیوں جے ساری قوماں اپنی اپنی زبان بول تے لکھ رہئیاں سن پر پنجابی اردو دے ایڈے سجن ہو گئے بئی اپنی ماں بول بھل گئے۔ ہن پنڈ ہووے یاں شہر جیہڑا بندہ تے زنانی کسے انجان نوں بلائے گا جھٹ اردو بولن لگ پئے گا۔ ایس گل نے دوجے صوبیاں دے لوکاں نوں ایہہ سمجھن تے مجبور کر دتا بئی اوہناں اتے اردو پنجابیاں نے لدی ہوئی اے۔

رہتل تے زبان دے مسئلے اپنی تھاں پر سیاست وچ وی ایہہ گل پکی ہو گئی بئی پاکستان نوں کٹھا رکھنا بس پنجاب دی لوڑ اے تے باقی صوبیاں نوں پنجابی لٹ رہئے نیں۔ کسے حد تائیں گل ٹھیک اے کیوں جے سول تے فوجی افسراں جو وڈھیاں کھاہدیاں یاں لوکاں دے حق مارے تے پنجاب وچ ایس دے خلاف کوئی ہل جل نہ ہوئی۔ لوکیں ایہہ سمجھن لگ پئے بئی پنجابی سارے رل کے اوہناں دا حق مار رہئے نیں۔

ہن گل بھانویں بلوچاں دی ہووے تے بھانویں پٹھاناں دے خلاف ہوون والے دھرو دی ہووے سارے ای ایہہ سمجھدے نیں کہ جو اوہناں دے نال بیت رہئی اے پنجاب دی لوکائی اوس دے وچ رلی ہوئی اے۔ تھاں تھاں پنجاب دے خلاف نعرے وج دے نیں تے تھاں تھاں پنجابی نوں گالھ مندا بولیا جاندا اے۔ گل اصل وچ کجھ ہور اے تے لوکاں نوں وکھایا کجھ ہور جا رہیا اے۔ اصل گل تے مال دی لٹ مار دی اے پر اکھیا جا رہیا اے بئی پنجاب ظالم اے جیہڑا لٹ مار کر رہئیا اے۔ ایس گل نوں نکھیڑن لئی کوئی ساہمنے آؤندا پیا اے تے نہ ہی ایس دی لوڑ سمجھی جا رہئی اے۔

سجن لہور اخبار دی شکل وچ جدوں اج توں 30 ورھے پہلوں کڈھیا گیا سی تے اوس ویلے انٹر نیٹ دی ٹیکنالوجی اسر رہی سی۔ اج ایہہ ٹیکنالوجی اینی اگے ودھ گئی اے بئی ہن کوئی شے ایس دے بغیر نہ وک رہئی اے تے نہ اگے ودھ سکدی اے۔ سجناں نے مل کے ایہہ آہر کیتا اے بئی پنجاب دی زبان دے نال نال ایس صوبے دے لوکاں دی سوچ دا ایہہ پکھ وی وکھایا جاوے بئی پنجابی دوجی قوماں تے زباناں دے خلاف نہیں۔ ایہہ گل کسے ہور نوں دسن توں بوہتا پنجابیاں نوں دسن دی لوڑ اے۔ ایس لئی پنجابی زبان دا سجن آن لائن لیاندا گیا اے جس دی ساریاں نوں بڑی لوڑ سی۔

اپنی رائے دا اظہار کرو

3 تبصرے “پنجاب دی سوچ دا دوجا پکھ

  1. جو کوی لکھنا یاں وڈیو شیر کرنا چاھن اوھناں لیی کوی ای میل ایڈریس یا فون نمبر وی لکھ دیو۔

  2. بے شک اردو ہر تھاں آوے پر پنجابی مر نہ جاوے

تبصرے بند ہیں