مینوں سپر ہائی وے دے تماشے نھیں چاھیدے ” میں اپنے رستےخود لوڑاں “

لکھاری. زاھد اقبال بٹ
اسیں سماجی پردھاناں تے کن ٹٹے کھڑپینچاں نوں ڈھونڈ ڈھونڈ کے آپوں لبھ نے آں تاں جے اوہ ساڈے اتے حکم چلاون فیر سانوں اپنی مرضی نال بھکیاں رکھ مار مکاون ۔۔ کیونجے احمکاں دی اس منڈی وچ اجیھے لوک اپنے بل بوتے اتے زندہ رھن دی زھانت نھیں رکھدے تے نہ ھی ایہ آھلکسی اپنی مرضی نال پینڈا کرنا چاھندے نیں اس کمزوری توں فیدا چکدیاں چالبازاں لوکاں نوں بناں زھانت دی تعلیم دتی تے اپنے سبقاں دے گھوٹے را ء طوطیاں نوں رج رٹائے ۔ ریاستی کھڑپینچ اس گل دے جانوں سن کہ معاشرے چلاون واسطے احمکاں دی لوڑ ھوندی اے تے ایہ ریوڑہ اوھناں نوں اپنی دوکانداری چلاون ، چمکاون واسطے لکھاں، کروڑاں دی گنتری وچ ان ملے لبھ گئے تے ایہ سلسلا اجے تائیں جاری اے ، ایھ گل وی سچ اے کہ کھڑ پینچ زھانت توں بھوں ڈر دے ،مردے ، سڑدے تے خوف کھاندے نیں تے اپنے آپ نال محبت کرن والے لوکاں توں چڑ کھاندے نیں جد کے احمکاں نوں اپنی گودی بٹھابٹھا لوریاں سناندے نھیں تھکدے کیونجے ایہ دھگانے دے سرپنچ چنگی طرحاں جاندے نیں پئی احمقاں نوںایس ای طرحاں پچکار کے اسانی نال قابو کیتا جا سکدا اے ، ورتیا جا سکدا اے تے دوجے پاسے ایھناں نوں پتا اے زھین لوکیں ضروری نھیں کہ اوہ ایھناں دی تابع دار ی وی کرن ، زھین لوک ماضی دی پرستش نھیں کردے تے نہ ھی مردہ لاشاں موڈھے اتے چکی پھردے نیں ، اوہ حال وچ جی کے مستقبل تخلیق کردے نیں ۔ھن گل کر لئیے روایت پرستاں دی ، قبر پرستاں دی، روایت پرستاں اس سماج نوں ڈکرے ڈکرے کر کے رکھ دتا اے سٹے وچ ھر بندہ پیراں اتے ڈگن لئی تیار کھلوتا اے،جان دی بازی مارن ایہ کھوتا تیار کھلوتا اے ،اپنے ھوون دا احساس اس جوئے وچ ہاری کھلوتا اے ۔ گل سن مترا۔۔ ایھ گل پلے گنڈھ مار لے کہ اپنے ھوون دا احساس سر چک کے جیون دی اٹکل دسدا اے کسے دی پیری پے کے اپنے آپ نوں اپنی ھتھی نھیں وڈدا تے نہ ھی اپنے آپ توں ھٹدا اے ، اپنے اندر وں پنگردی سچائی اتے ڈٹ کھلوون دا پک کریندا اے ، ازلاں توں لڑہ لگیاں پکیاں لکھیاں تختیاں ” گاچی ” مار مکاوندا اے ، سازندیاں دی راگنی چک نیزے اتے ٹنگ دا اے ۔۔۔۔مترا۔۔۔۔ مینوں سپر ہائی وے دے تماشے نھیں چاھیدے ، میں اپنے رستےخود لوڑاں ۔۔۔۔ میں اپنے رستےخود لوڑاں ۔۔۔۔