لکھاری : زاھد اقبال بٹ
جے کر اساں اپنی شخصیت اُتے چڑھے جعلی خول نُوں تروڑن وچ کامیاب ھو جانے آں تے اساں اپنے موجُود لمحیاں نوں چکھ سکنے آں ، ماضی مُستقبل دیاں پُسوڑیاں توں جان چُھڈا سکنے آں ، لوکاں دی سیوا بناں مطلب کڈھیو کر سکنے آں ، کرودہ ،مُنافقت ، اک دوجے نوں تھلے لاون دیاں مکاریاں تُوں جان چُھڈا سکنے آں ، کسے دے کیتے فلاحی کماں نُوں اپنے ول گھسیٹن تُوں باز آ سکنے آں ، سیاسی ۔ سماجی ، سپورٹس دے ماڑے تے لسے لوکاں دے نکے نکے معصوم گروپاں نوں فائدہ دیون دی تھاں اُوھناں نُوں نقصان پُہنچاون توں گریز کر سکنے آں ، پر مترا ایہ کاریگر مُونہ دے مٹھرے کُھوچل لوک اپنی جعلی پگ تے مُونھ لگے خُون نوں چُوسن توں دریغ نھیں کر دے ، ایہ ایکسپلائیٹر بے روزگار ، سٹرگلر تے نہ سمجھ نوجواناں دے مُوڈھے ورت کے اچے اچے عُہدیاں دے گُل چھرے اُڈاندے نیں ،،، ایہ وڈیاں وڈیاں کندھاں تے اُچے اُچے کالے گیٹاں دے کھوچل مالک ، جُھوٹی مُوٹھی دے تھاپڑیاں تے طفل تسلیاں دے بھانے اپنا چُورن ویچ دے رھندے نیں ، ایہ ترکھی اکھ رکھن والے کھو چل کدی وی اپنے پولیو زدھ مکار شخصیت توں باہر آ ھی نھیں سکدا ،،، کُیونجے اس نوں علم اے جو اس دے ہتھ وچ اے یاں جس شھر دی زمین اُتے پیر جمائی کھلوتا اے اوہ سب کُجھ مُک جاسی اس لئی ایہ ترکھی اکھ رکھن والا کھوچل ہمیشا علاقے دے اک دو ٹُچکے تاوئٹ نال رکھے گا تاں جے لوکاں دا تیل کڈھن والاکُولہو چل دا رھے ،،،، پر مترا سیاسی مُعاشی سماجی کھانگھڑ اس ایکسپلائیٹیشن دی سیچوئیشن وچ رھنا اپنی جعلی عافیت سمجھدے نیں کیونجے ایہ ٹھگی ٹھگیچی دی لُکن میٹی وچ دونواں دھراں نوں چسکا تے سرُور وی حاصل ھوندا اے ، ماڑا تے لسا مظلوم ایس امید اتے کھوچل نال چمڑیا رھندا اے کہ شید اوھدے نکے مُوٹے کم کدی تاں نکلن گے ایہ لکھاں سیچوئیشنز دے زائیقے تے چسکے oppressor تے oppressed وچکار خموشی نال پینڈا کر دے رھندے نیں تے نویں نویکلے ویھلے تے فارغ نوجواناں دے کردار ایھناں دی لائی پھائی وچ پھسدے رھندے نیں تے جے حضوری دی رٹ لائی رکھدے نیں …. مترا……. سائیکالوجی دے دو تن مُوٹے مُوٹے لفظ استعمال کر کے موضُوع دا شٹاپو الیکیا جا سکدا اے پر موضوٰع شیطان دی آنت وانگوِ لما اے ۔۔۔۔۔۔۔۔۔۔۔ گل بات جاری رھوے گی
405
