حکیم جی دا چورن

پاکستان وچ کسے نوں درد وی ہووے تاں اکو ای حکیم اے ، جنہوں جاکے ہر سیاستدان وڈا تاجر تے صنعتکار اپنا حال سنادا اے۔ ایہہ گل ہن کھل کے ساہمنے آگئی اے۔ پئی سانوں اپنے مسئلے کیہڑے حکیم نوں دسنے نیں۔
جسٹس ثاقب نثار برطانیہ وچ بیٹھے پاکستانی سیٹھ انور پرویز سیمنٹ انڈسٹری وچ رقماں لگیاں نیں، اک وڈے بنک دا مالک وی اے۔ اوس نوں جدوں تنگ کیتا تاں اوس حکیم جی نوں شکایت کیتی۔ ایہدے باوجود ثاقب نثار نوں کوئی فرق نہ پیا، مڑ اوس نوں گل سمجھ آگئی اوس کسے ہور وڈے صنعتکار نال رل کے ڈیم فنڈ وچ 3 لکھ پاونڈ چندہ دے دتا، جیہدے مگروں ثاقب نثار اوس دی بڑی تعریف کیتی۔
عمران خان دی سرکار جدوں توں آئی اے، حکیم ہوراں دا چورن زیادہ ویکن لگ پیا اے، اوہناں دا چھوٹا پوڑیاں بنا بنا کے ونڈی جاندا اے۔
میڈیا وچ کیہ کجھ ہورہیا اے، سیاستدان اپنی بولی بول رہے نیں، سرکار دا اپنا کم چل رہیا اے۔ کاروباری بندے پہلاں توں ودھ پریشان نیں، کیوں جے ایس طبقے نوں کسے دور وچ خوش نئیں ویکھیا، ایہہ ضرور اے اپنے مطلب دی سرکار ہووے تاں چپ وٹ لیندے نیں۔ بوہتا رولا نئیں پاندے۔ مندا اینہاں دے نصیب وچ لکھیا گیا اے۔
اوہدے نتیجے وچ لوکاں نال وی رجھ مندا کردے نیں، جدوں داء لگدا فیر رولا پالیندے نیں۔ تریخ وچ کدے نئیں سنیا اینہاں آکھیا ہووے کجھ چنگا ہورہیا اے۔ اک دکاندار توں پچھ لوو، اوہ آکھے گا سرکار بڑا تنگ کردی اے، من لیا سرکاراں ساریاں ای پمبل بھوسے وچ پائی رکھ دیاں نیں، اینہاں کدے کوئی چنگا لوکاں لئی کیتا۔ تاں دسن۔
سرکاراں نال اٹی سٹی کرکے اپے فیدے چکدے رہے، جے کجھ نہ بن سکے تاں حکیم نال ملن ٹر جاندے نیں۔ ایہوں کجھ سیاستدان وی کردے نیں اپنا چورن نہ ویکے تاں حکیم کول ٹر جاندے نیں۔
ہن فیر تاجراں ایہو کجھ کیتا اوہناں سوچیا جے سرکار حکیم دے مشورے نال چل رہی اے تاں اوس دی شکایت وی حکیم نال لائی جاوے۔ سارا کنٹرول تاں اوس ہتھ اے۔ ہوسکدا کجھ ساڈے ہتھ وی لگ جاوے۔
سوال صرف ایہہ ذھناں وچ اٹھ دا اے پئی لوکاں نوں جیہڑا چورن ونڈیا جارہیا اے، اوس نال اوہ ہور روگی بن رہے نیں، اوہناں نوں تاں کجھ چنگا چورن دیو۔ نئیں تاں سیاستدان، تاجر تے حکیم لوکاں دے نقصان دے ذمے دار ہوون گے۔