مولانا تے تقریر

لیکھ، سلیم صافی
مولانا صاحب دے بنے بنائے کھیڈ اتے وزیراعظم دی اک تقریر نے پانی پھیر دتا۔ اوہ بڑے ذوق شوق نال ناموس رسالتؐ دا کارڈ ورت کے لوکاں نوں کٹھا کرنا چاہندے سن مگر اقوام متحدہ وچ عمران خان نے اجیہی گلاں کیتیاں کہ پوری مسلمان دنیا اَش اَش کر اٹھی۔
پچھلے دناں سیٹھاں دے اک گروہ نے وی آرمی چیف نال ملاقات کیتی ، اینہاں وچ کئی سیٹھ سابق حکمراناں لئی کم کردے نیں۔ اوہناں دا ایہہ حال اے کہ 12 ارب ڈالر کی تجارت کر کے صرف چھ ارب ڈالر شو کردے نیں، باقی پیسہ پرانے آقائوں دی خواہش مطابق باہروں باہر دنیا دے دوجے ملکاں وچ گھل دیندے نیں۔
ملاقات دا ایہہ کھیڈ جیلاں وچ بند مبینہ لٹ مار کرن والیاں دی خواہش اتے رچایا گیا۔ ایس دا مقصد ایہہ سی کہ موجودہ سرکار خلاف کم نوں تیز کیتا جائے۔ ایس ملاقات نوں جنرل آصف غفور نے سیمینار وچ تبدیل کر کے خواہش نوں حسرت وچ بدل دتا۔
میری مولانا نال پرانی سلام دعا اے ، میں عرصہ پہلے اوہناں توں عرض کیتی سی تسیں دینی شخصیت او، لوک تہاڈی عزت کردے نیں، لوکیں عزت کیلئے سیاست کردے نیں، تسیں کیوں سیاست کردے او؟ مولانا دا جواب سی ’’میں عزت بچاون لئی سیاست کردا ہاں‘‘۔
مولانا صاحب ویسے تاں سلیم صافی نوں سی جواب نہیں دے پائے سن، جد پچھِا گیا کہ ناموس رسالتؐ حوالے نال خطاکار حکومت دا ساتھ کیوں دے رہے او؟ تاں مولانا نے کہیا اگے ٹرو کوئی ہور سوال کرو، اینکر نے جواب منگیا تاں فرمایا ’’انسان خطاکار اے، اسیں حکومت دا ساتھ ایس لئی دے رہے آں تاں جے خطا کاراں دی رہنمائی کر سکیئے‘‘۔
دنیا بھر دے سکھ مولانا دے مارچ نوں وی بھارت نال جوڑ رہے نیں۔ اوہناں دا آکھنا اے کہ نومبر وچ گورو نانک دا 550 واں جنم دن منایا جا رہیا اے تے مولانا ایس دوران حالات وگاڑنا چاہندے نیں۔
تہانوں یاد ہووے گا کہ دو ورھے پہلاں مولانا نے جمعیت علمائے اسلام ہند دا سو سالہ جشن منایا سی، ایہہ اوہو جمعیت علمائے اسلام ہند اے جنہے پاکستان دی مخالفت کیتی سی، اج جمعیت علمائے اسلام ہند دے جنرل سیکرٹری مولانا محمود مدنی دسدے نیں ’’اوہناں دی جماعت دی گیارہ ستمبر نوں جنرل کونسل دی میٹنگ سی، ایہدی منظور کیتی قرارداد دے تن حصے نیں۔
پہلا ایہہ کہ بھارت حکومت کشمیر وچ صورتحال چھیتی نال تبدیل کر دے، لوکاں لئی اسانی پیدا کیتی جائے، نمبر دو پاکستان سمیت دنیا دے کسے وی ملک دی کشمیر وچ مداخلت قبول نئیں اے کیوں جے کشمیر بھارت دا اٹوٹ انگ اے،
ایہہ اسیں 1951، 1963تے 2009 وچ کہیا سی ہن فیر ایہہ پک کردے آں کہ کشمیر بھارت دا حصہ اے‘‘۔مولانا فضل الرحمان صاحب! دسنا پسند فرمان گے کہ اوہ ایسی جماعت دا صد سالہ جشن کیوں مناندے نیں؟ مولانا صاحب توں کجھ سوال پاکستانیاں نے کیتے نیں:
باجوڑ مدرسے تے لال مسجد وچ شہادتاں ہوئیاں، تسیں چپ رہے۔
جد اک سفارت خانے نوں سینکڑاں کنال زمین دتی جارہی سی، تے تہاڈی پیاری سرکاراں سینکڑاں امریکیاں نوں دھڑا دھڑ ویزے جاری کر رہی سن، کیوں چپ رہے؟
عافیہ صدیقی دی حوالگی، ممتاز قادری دی گرفتاری تے پھانسی اتے چپ رہے، کیوں؟
جد نواز شریف نے میڈیا دے ساہمنے خدا تے بھگوان نوں اک ای کہہ دتا، کیوں چپ رہے؟
کارگل اتے غلط فیصلے اتے کیوں چپ لگ گئی؟
جد پرویز رشید نے مدرسیاں نوں جہالت دی فیکٹریاں کہیا، جد ختم نبوتؐ دی ترمیم نوں نواز دور وچ چھیڑیا گیا، تسیں باہر کیوں نہ نکلے؟
دس ورھے کشمیر کمیٹی دے چیئرمین رہے تے کشمیر دی گل تیک نئیں کرسکے، کیوں؟
شکریہ روزانہ جنگ