لکھاری، امجد سلیم منہاس
کشمیر مسئلہ ساڈی اسٹیبلشمنٹ دا من پسند مسئلہ رہیا جنھوں اپنے ملک وچ جمھوری لہر نوں ٹھپن لئی ورتیا جاندا رہیا اے۔پیپلز پارٹی سنے ہر سیاسی جماعت نے اسٹیبلشمنٹ دی نیڑتا حاصل کرن لئی ایہدی جنھی ودھ حمایت کیتی جمھوری منزل اونی ہی دور ہوئی۔ایتھوں تیک کہ ساڈے تنگ نظر جرنیلی ٹولے 89ء وچ افغان جہاد پدھر اتے لشکر طیبہ سنے درجناں جہادی گروپاں نوں کشمیر لانچ کرنا شروع کیتا۔راجیو گاندھی دی اسلام آباد آمد اتے کشمیر بورڈ ہٹان ورگی غلیظ مہم بے نظیر خلاف چلائی گئی جیہدے وچ اج دا مودی دا یار تے اوس ویلے انڈیا دشمنی دا سب توں وڈا لیڈر نواز شریف اگے اگے سی یا اوہنوں کیتا گیا سی۔بی بی تے نواز شریف وچ اک دوڑ سی کہ انڈیا دشمنی وچ ودھ کون ایں۔پیپلزپارٹی دشمنی وچ نواز شریف نوں جیتو قرار دتا گیا۔ایہہ دونویں پارٹیاں اندازہ نئیں لا سکیاں کہ غیر جمھوری قوت جنہاں گیارہ سال کسے نوں وی شامل کیتے بنا اقتدار اتے قبضہ کیتی رکھیا اوہنوں افغان جہاد توں حاصل ہوون والی لبھت دا کنا چسکا پہ چکیا اے۔ایہہ وی نہیں سمجھ سکے کہ سعودی عرب دا وہابی اسلام لشکر طیبہ تے حافظ سعید دی اگوائی وچ خطے دیاں سیاسی تبدیلیاں نوں ٹھلن لئی حرکت وچ آ چکیا اے۔
سبھ دے چیتے وچ اے کہ واجپائی دی لہور یاترا دوران ای چار دا جرنیلی ٹولہ کارگل شروع کر چکیا سی تے لہور وچ ایس ٹولے نے جماعت اسلامی نوں نواز شریف تے چھڈیا۔اوس ویلے پاک انڈیا پیپلز فورم بھنگ پیا کے بٹھا دتا گیا سی۔چار جرنیلی ٹولے نے ہی نواز شریف دا تختہ الٹیا تے مڑ یاراں۔ورھے حکومت کیتی تے نال ستمبر الیون نے دنیا دے مڈھلے ٹچے بدل کے رکھ دتے۔
ہن ساڈا جرنیلی ٹولہ امریکہ چین تے مغرب دے بھار پاروں آہستہ آہستہ جہاد جیہے اہم ” رکن اسلام ” توں مونہہ موڑن لگ پیا۔
ایس پس منظر وچ اسیں ویکھییے تے ساڈی ریاست جہادی اسلام دی ضیا الحقی تے حمید گلی تشریح توں باہر نکلن اتے مجبور کر دتی گئی تے مجبور کرن والیاں قوتاں اوہو سن جنہاں نے ایہہ جہاد شروع کروایا سی۔
ہن ساڈی سسٹیبلشمنٹ تے اوہدا جمھوری چہرہ عمران خان کہندا اے کہ جنگ خطے تے دنیا لئی تباہ کن ہوسی لیکن پچھلے 30 سال۔جیہڑی اپنے ملک خطے تے دنیا تے تباہی پھیلی اوہدا نہ کوئی حساب دین والا تے نہ کوئی لین والا۔اوس ویلے جیہڑے جیہڑے ایس رستے تے ٹورن دے نقصانات توں عوام نوں آگاہ کردے سن تے اوہ غدار تے انڈیا دے ایجنٹ۔اکھوائے جاندے سن۔
ہن کیہ کریے؟
ایس ویلے دنیا وچ کسے تحریک نوں حمایت مل سکدی اے تے حق خودارادیت دی پرامن تے اندرونی تحریک نوں ہی مل سکدی اے۔سانوں دسنا ہووے گا کہ اسیں جس طرحاں اپنے ملک وچ جمھوری تے شہری آزادی لئی جد و جہد کر رے ہاں اوسے طرحاں کشمیر فلسطین دی آزادی لئی پرامن جدوجہد دی حمایت جاری رکھاں گے۔
