ہتھیار بال نوں کیوں دتا؟

لہور وچ اک ست ورھے دے بال نے کھیڈدے کمرے وچ پئی پستول نوں پھڑ کے چلادتا، دسیا جاندا اے گولی اوس دے دادے نوں وج گئی،اسلام پورہ دا حنیف بٹ ،پوترے عارف ہتھوں لگن والی گولی پاروں ڈاھڈا زخمی ہوگیا،جنہوں میو ہسپتال لے جایاگیا،جتھے اوس دے ساہ مُک گئے۔ پلس دا دسنا اے ،پستول اتے بال دا پیر لگن پاروں گولی چلی۔

گھراں وچ ہتھیار تے کھڈونے انج ای نال نال پئے ہوندے نیں، بالاں نوں کھیڈلئی پستولاں لے دتیاں ہوندیاں نیں۔ کجھ کسر فلماں وچ ویکھ کے بال پوری کرلیندے نیں۔
بندہ کیوں بندے دا ویری بنیااے۔ اوس دوجے نوں مارن ،ڈراون تے نقصان پہنچان لئی ہتھیار بنائے، جنگاں لڑیاں، کئی میدان مارے۔ ازل توں انسان دا قتلام ہوندا آیا۔ ایہہ ہتھیار بندے نوں مکاون لئی بنائے گئے سن۔

اج لوکاں نوں اوہی ایکشن فلماں چنگیاں لگدیاں نیں، جنہاں وچ ون سونا ہتھیار ورتیاجاندا اے۔ وڈیو گیماں وی اوہو پسند کیتی جاندیاں نیں، جنہاں وچ گن مین لوکاں نوں ماردا اے۔
انسان اک پاسے زندگی لمی کرن دے طریقے لبھدا اے ، آپ نوں محفوظ کرن دیاں راہواں تلاش دا اے، دوجے پاسے انسان نوں مارن دے جتن وی کرداتے ہتھیار وی بناوندا۔
بالاں نوں نکے ہوندے ای ، فلماں تے کھڈونیاں دی شکل وچ ایہہ راہ وکھادیندے آں۔
ہور کجھ نئیں تاں ، اوہ بال اجیہے حادثے دا کارن بن جاندے نیں۔مڑ سارا ٹبر ایس دا دکھڑا لے کے ماتم کردا رہندا اے۔
اسیں ایہہ کھڈونے تے اصلی ہتھیار کیوں انج کھلے پئے رکھدے آں، اینہاں دا ساڈی زندگی نال کیہ رشتہ اے۔ کیہ ایہدے بغیرساڈی راکھی ممکن نئیں
اسیں شاید ایہہ گل کدے نئیں سمجھ پاواں گے، کیوں جے چنگی صلاح تے مت منن دی عادت ہوندی تاں ہتھیاراکٹھے کرن دی ہوڑمتی گھٹ ہوگئی ہوندی۔
اج اسیں بالاں ہتھوں گولی لگ کے مرن اتے ماتم نہ کررہے ہوندے۔
سانوں ایہہ گل سمجھ نئیں آسکدی۔ناں اسیں سمجھ سکدے آں۔