طفیلی ریاست

لکھاری: طارق بٹ

عالمی پَدھر اُتے ویلے کویلے بنن آلے وکھو وَکھ فوجی گٹھ جوڑاں وچ پاکستان دے رَلن دی تریخ اونی ہی پرانی اے جِناں پاکستان آپوں۔ ایس گل اِچ رَتی برابر وی شک نہیں کہ پچھلے 70 ورھیاں دوران پاکستانی فوج ڈھیر تگڑی ہوئی اے، پر جے کر ذرا کھوج کریئے تاں پتہ لگدائے کہ مقابلے اِچ پاکستان اونا ای کمزور ہویا اے۔
امریکہ تے برطانیہ دے کہن اُتے 1955ء اِچ CENTO
(Central Treaty Organisation)
نامی تنظیم بنائی گئی، ایس فوجی گٹھ جوڑ دا مقصد کمیونزم نوں مشرق وسطیٰ دے ملکاں وَل ودھن توں روکنا سی۔ ایران، عراق، ترکی، پاکستان تے برطانیہ ایہدے رکن سن۔ 1959ء وچ بادشاہت مُکن تے عراق ایس اتحاد نالوں وکھ ہو گیا تے اوسے ورھے امریکہ ایہدا ایسوسی ایٹ ممبر بن گیا۔ 1979ء اِچ شہنشاہت دے خاتمے بعدوں ایران دے اتحاد وچوں نکلن کارن ایہہ اتحاد ٹُٹ گیا۔
1954ء اِچ فلپائن دے دارالحکومت منیلا اندر SEATO
(Southeast Asian Treaty Organisation)
نامی تنظیم دی نیہہ رکھی گئی۔ امریکہ، فرانس، برطانیہ، نیوزی لینڈ، آسٹریلیا، فلپائن، تھائی لینڈ تے پاکستان ایہدے رکن سن۔ ایس فوجی اتحاد دا مقصد جنوب مشرقی ایشیاء اندر کمیونزم دی راہ ڈکنا سی، حیرانگی دی گل اے پئی ایس اتحاد اِچ علاقے دے صرف دو ملک رَلے سن۔ پاکستان 1973ء اِچ ایہدے توں وکھ ہو گیا۔ 1975ء اِچ ویت نام دی جنگ ختم ہوون مگروں اتحادی ملکاں دی دلچسپی گھٹن کارن 1977ء وچ ایہ اتحاد وی ٹُٹ گیا۔
1979ء اِچ سوویت یونین دے افغانستان وڑھن مگروں امریکہ تے اوہدے اتحادیاں نے جہاد دے ناں تے اوتھے خانہ جنگی شروع کرا دتی جیہدے وچ پاکستان فرنٹ لائن سٹیٹ بنیا۔ اوس ویلے دے فوجی آمر نے وڈِیاں طاقتاں دی ایس جنگ نوں جہاد دا ناں دے کے پاکستان اندر تھاں تھاں جنگی تربیتی مرکز اُسارے تے ملک دیاں سرحداں دنیا بھر توں آؤن والے لڑاکا جتھیاں لئی کھول دتیاں جنہاں بعدوں پاکستانی ریاست تے سماج دی اِٹ نال اِٹ وجا دتی۔ ایس جنگ وچ امریکہ تے اوہدے اتحادیاں دے ڈالراں نال سعودی عرب نے وی آپنے ڈالر ملا کے سَٹے جیہڑے کُجھ لوکاں دے کِھیسیاں اِچ ٹُر گئے پر عام لوکاں لئی تباہی تے بربادی چَھڈ گئے۔ اَج وی کوئی نئیں دَس سکدا کہ ایس فساد دا نقصان پاکستان دیاں ہور کنیاں نسلاں نوں بھگتنا پوسی؟
2001ء اِچ جدوں امریکہ نے افغانستان اُتے حملہ کیتا تے پاکستان فیر امریکہ دا اتحادی بنیا، بعدوں پاکستان نوں
Non NATO
اتحادی دا درجہ دتا گیا۔ دہشت گردی خلاف ہوئی ایس جنگ اِچ 70 ہزار توں چوکھے پاکستانی مارے گئے، معاشی نقصان 125 ارب ڈالر دَسیا جاندائے جد کہ سماجی نقصان دا کوئی حساب نئیں۔
ہُن سعودی عرب دی آگوائی وچ بنن آلے اسلامی فوجی اتحاد اِچ پاکستان اِک وار فیر رَلیائے۔ 2015 وچ بنن آلے ایس اتحاد اِچ 35 مسلمان ملک رَلے ہین، جنرل راحیل شریف نوں اتحادی ملکاں دی سانجھی فوج دا سربراہ بنایا گیا اے جیہدا مقصد علاقے اندر دہشت گردی نال نبڑناں اے۔ کُجھ لوک ایہنوں شیعہ مخالف اتحاد دا ناں وی دے رہے نیں، جے ایہدے اِچ اِک فیصدی وی سچ اے تاں ایہ سارے مسلماناں لئی ڈاڈھے فکر آلی گل اے۔
سعودی ولی عہد شہزادہ محمد بن سلمان دے دورہ پاکستان دوران 20 ارب ڈالر دی سرمایہ کاری دا اعلان کیتا گیا جو کہ سلاہن جوگ اے پر ایس دورے دا اک ہور مقصد وی سمجھ آوندا اے۔ شہزادے دا ایہ آکھنا پئی اوہ آرمی چیف جنرل قمر جاوید باجوہ دے سَدے اَپر پاکستان آئے ہین، دوجا دورے توں کُجھ دیہاڑ پہلوں جنرل راحیل شریف دا پاکستان آؤنا تے آؤندیاں سار فوجی قیادت نوں ملناں، چوکھا اہم اے۔
1982ء اِچ پاکستان تے سعودی عرب وچکار ہوون والے دفاعی پروٹوکول پاروں ایس ویلے پاکستان دے 13 ہزار فوجی دستے تے 6 ہزار تربیتی عملہ سعودی عرب اندر موجود اے۔ آکھیا جا رہیا اے کہ ہور 15 ہزار فوجی چھیتی سعودیہ گھلے جاسن جد کہ اگلے کُجھ ورھیاں دوران اِک لکھ تائیں پاکستانی فوجی دستے سعودی عرب گھلے جاون دیاں خبراں ہین۔ کُجھ نئیں کہیا جا سکدا کہ پاکستان تے ایہدے لوکاں نوں ایس نویں فوجی گٹھ جوڑ اِچ رّلن دا کیہ مُل تارنا پوسی؟ اسیں نمانے آپنی فوج نوں کسے وی اتحاد اِچ رَلن توں کیویں ڈک سکنے آں، اساڈی خالی ایہو منگ اے پئی ہُن کسے وی نویں فوجی اتحاد اِچ رَلن توں پہلاں پچھوکڑ وَل ضرور جھاتی مار لئی جائے کیوں جے ایس پالیسی کارن پاکستان آپنے پَیراں تے کھلوون دی تھاں اِک طفیلی ریاست بن گیا اے۔