دیس ہویا پردیس نی مائے
مائے نی توں ٹر گئیوں تے دیس ہویا پردیس نی
ڈاروں وچھڑی کونج نمانی
پھردی ٹکراں مار دی اے
ہڈیاں دا اک پنجر دسدا
بدل گیا انج بھیس نی
مائے نی توں ٹر گئیوں تے دیس ہویا پردیس نی
الف اللہ دی تسبیح کردے
بھج بھج وڑہن مسیتاں نوں
کس جا متھا ٹیکاں، رٹھ گئے
کعبہ ، تلک ، کلیس نی
مائے نی توں ٹر گئیوں تے دیس ہویا پردیس نی
اکھیاں دے دو دیوے کر کے
ہنجواں لاٹ جگائی اے
سینے اٹھدی ٹیس نوں ویکھاں
سانبھاں دل درویش نی
مائے نی توں ٹر گئیوں تے دیس ہویا پردیس نی
بال شریکے دے رل بیٹھن
ہس ہس تالی ماردے نیں
ماں میٹر کلمونہہ کہایا
کس دے پٹاں کیس نی
مائے نی توں ٹر گئیوں تے دیس ہویا پردیس نی
لکن میٹی کھیڈدے سنگھی
ماں دی کچھڑ پالدے نیں
سر چھاویں دی ایس کھیڈ اندر
توں ای ایں میراکھیس نی
مائے نی توں ٹر گئیوں تے دیس ہویا پردیس نی
میں رجھیا ایس جیون پاروں
سد لے اپنے کول نی مینوں
ماں پتر رل بیٹھن جتھے
او ہی او اپنا دیس نی
مائے نی توں ٹر گئیوں تے دیس ہویا پردیس نی
لیکھ۔
محمد شجاع الدین
زبردست لکھیا جے ویر جی —-تاں لکھدے رھوو