736

کشمیر۔مودی سرکار تے اقوام متحدہ

لکھاری، امجد سلیم منہاس
بھارت وچ مودی سرکار دا کشمیر دی خاص حیثیت ختم کرن دا اعلان دنیا وچ افسوس، غم تے غصے نال سنیا گیا۔اقوام متحدہ،ا مریکہ ، یورپی یونین تے برطانیہ نے وڈی تے ڈونگھی چنتا دا اظہار کردیاں آکھیا کہ اسیں بدلدی صورتحال تے اکھ رکھی ہوئی اے تے ایہدا ویروا کردا پئے ہاں۔کل جگت وچ وکھرے کشمیری جتھے جتھے نے ایس بھارتی اقدام دی ڈاھڈی نندیا پئے کریندے نیں۔پاکستان سفارتی محاذ تے سوہنے طریقے نال سرگرم اے۔وزیر اعظم عمران خان ہن تک خطے سنے دنیا دے کئی ملکاں نوں صورت حال توں آگاہ کر چکے نیں۔وزیر خارجہ عالمی اداریاں نوں مسلسل صورت حال دسیندے پئے نیں۔حکومت نے چئیرمین سینٹ دی بنتی اتے پارلیمنٹ دا سانجھا اجلاس بلا لیا اے تے ایہدے نال ای آرمی چیف نے کور کمانڈراں دا اکٹھ سدیا اے۔پاکستان دیاں تمام سیاسی جما عتاں اس مدے اتے اک مٹھ نیں کہ انڈیا ساریاں سیاسی اخلاقی آئینی تے سفارتی حداں ٹپ چکیا اے۔
سبھ توں دلچسپ وکھالا انڈیا دیاں تمام اپوززیشن جماعتاں مودی سرکار دی ایس حرکت نوں ملک دی سلامتی لئی خطرناک قرار دے رہیاں نیں۔
پورے کشمیر وچ کرفیو پاروں ہو دا سماں اے۔ست لکھ فوج جیہڑی آزادی منگ نوں نپ نئیں سکی اوہدی مدد لئی ستر ہزار فوج ہور بھیجن دا اعلان کشمیریاں دا بھارت اتے عدم اعتماد دا واضح اطہار اے۔قومی سطح دی سیاست کرن والی سابق ریاستی سربراہ محبوبہ مفتی دا ایہہ اعتراف کہ ساڈے پرکھاں نے انڈیا نال رل کے غلطی کیتی سی،انڈین فیڈریشن تے عدم اعتماد دا واضح اعلان اے۔
ہن اسیں کیہ کرنا اے؟
ایہہ گل بڑی واضح اے کہ جدوں توں پاکستان نے اپنے غیر ریاستی مسلح کرداراں نوں ٹھپ کے کشمیریاں دی سفارتی حمایت دیاں کوششاں وچ وادھا کیتا اے انڈیا دی مایوسی وچ اضافہ ہویا اے۔ٹرمپ دی وچولا گری دی آفر نے عالمی پدھر اتے پاکستان دی تنہائی مکائی اے۔سانوں ہن اک چاروں پاسی بھرویں کوششاں دا آغاز کر دینا چاہیدا اے۔کشمیر اتے خارجہ امور کمیٹیاں دی سر براہی اپوزیشن دی متحرک نوجوان قیادت نوں دتی جاوے۔دفتر خارجہ تے منتخب لیڈراں نوں سفارتی مشناں اتے دنیا بھر وچ گھلیا جائے۔نوجوان پڈھیار ، صحافی تے سول سوسائیٹی نوں ٹریک ٹو پالیسی دے مطابق دنیا بھر وچ متحرک کیتا جاوے۔ایہہ ویلا دنیا وچ پاکستان دے پرامن امیج نوں ابھارن لئی اک گولڈن چانس اے۔سانوں انتہا پسند غیر رہاستی عناصر تے گہری نظر رکھن دی لوڑ اے تاں جے ایہہ عناصر پاکستان نوں حاصل ہوون والی سفارتی حمایت نوں نقصان نہ پہنچا سکن۔
آخری گل ایہہ اے کہ برا قانون یا بری قانون سازی دنیا بھر وچ ناقابل عمل سمجھی جاندی اے۔ایس طرحاں دی قنون سازی عمل جوگ ہوندی تے جنوبی افریقہ سنے ساری دنیا حالے وی کالونی گیری دا شکار ہوندی۔خاطر جمع رکھو مودی سرکار دی ایس گھٹیا قانون سازی نال کشمیری آزادی لہر دبائی نہیں جا سکدی۔

اپنی رائے دا اظہار کرو

کشمیر۔مودی سرکار تے اقوام متحدہ” ایک تبصرہ

  1. sahi.sarkar noo salamti council de membran naal cheti toon cheti rabta karna chahida te oos da ijlas bulanaydi binti karni chahidi. pakistani te kashmiri te hor dost mulkan de talbon noo kashmiri wich bharti dharo mukhalif awaz othanay ki tehreek chalnyen

تبصرے بند ہیں