کساناں دا کوئی پچھن والا نہیں

لکھاری
رشید چودھری

سیاسی نوٹنکی نے کساناں اتے واپری آفت اکھوں پروکھی کر دتی ہے۔ پنجاب سرکار دے نویں گویڑ موجب نقصان پنج لکھ ایکڑ توں ودھ کھڑی فصل اتے ہوئیا اے۔ ہالے پنجاب حکومت نے کنک خرید کرنا شروع نہیں کیتی پر اوپن مارکیٹ وچ جنس آنا شروع ہو گئی ہے۔ ایہدا وڈا کارن توڑی جاں بھوہ دا کال اے جیہنے پورے پنجاب نوں کئی مہینیاں توں جپھا ماریا ہوئیا اے۔ جیہڑی کنک نکل دی پئی ہے اوہ سلھی اے۔ ایہہ سلھابہ اوہناں ضلعیاں وچ وی ھے جتھے مینہ نھیری دی مار کجھ گھٹ رہی۔ کل شیخوپورے منڈی وکی کنک وچ سلھابے جاں نمی دا حصہ 19فیصد توں وی ودھ متھیا گیا۔ تیراں حد چوداں فیصد سلھابے والا دانہ خشک گنیا جاندا اے۔ ایس توں ودھ سلھابے والی کنک سٹور کرن دے قابل نہیں متھی جاندی اتے گھٹ مل پاوندی ھے۔ 18فیصد توں ودھ نمی والی کنک نوں ہوا اتے دھپ نال سکایا وی نہیں جا سکدا۔ دوست شہزاد انور دے دس موجب شیخوپورے منڈی وچ سکی کنک نے باراں سو پنجاہ اتے سلھی کنک نے 1150روپئے مل کھوہیا۔ سرکاری ریٹ پچھلے چار ورھیاں توں 1300 ھے پر کسان نوں ایس توں گھٹ ای ڈھیج دا ہے کیونکہ عالمی منڈی وچ کنک کئیاں ورھیاں توں سولّی اے۔ بھاویں ایہدا بھا پچھلے کجھ ہفتیاں وچ چڑھیا اے پر اج وی ایہدا عالمی ریٹ 1200روپئے من ای بندا اے۔ کھلی منڈی کساناں نال ایس توں ودھ سخاوت نہیں کر سکدی، پاسکو تے فوڈ ڈیپارٹمنٹ نے کنک خرید وچ اوہی کجھ کرنا اے جو پچھلے کئی ورھیاں توں کر دے آئے نیں۔ ایہہ تے اوہناں کساناں نال ہونا جیہناں دا کجھ بچ گیا اے۔ جہہناں دی کل فصل برباد ہو گئی اوہناں واسطے تے کوئی اعلان وی نہیں ہویا۔ آفت ڈیکلئر کر کے نقصان دا پتہ کرن اتے تلافی دا اپاء کرن دی تھانویں سرکار وزیر وزیر کھیڈ دی پئی اے۔