478

سرکار توں کوئی آس وی نئیں

لکھاری، وسیم عظمت
وگڑے ہوئے شہزادیاں دی حکومت نوں عوام وچارے تے کجھ کہندے ہی نہیں پئے. صرف خواص ہی کہندے پئے نیں, کیہہ کہندے پئے نیں، سر کھپاون والی گل ایہہ نہیں کہ اختیار کنا سامنے موجود حکمراناں کول اے تے کنا پچھے بیٹھے حکمراناں کول اے تے عوام دے دکھاں وچ سامنے کھلوتے دا حصہ ودھ اے یا پچھے بیٹھیاں دا حصہ ودھ اے. دھیان کر کے سمجھن والی گل ایہہ وے کہ پچھے بیٹھے بھراواں نے اداریاں وچ سنھ لا کے پالیسی سازی, فیصلہ سازی اتے قبضہ کیتا تے عوام دے ووٹ لے کے آون والے سیاستداناں نوں حکومت دے کماں وچ اڑیکے پا پا کے ناکام کیتا تے فیر حکومت کرن لئی اپنے دوجے بھراواں نوں جیہڑے اجے تائیں اداریاں وچ کسی چنگی تھاں تے بیٹھ نہیں سکے, سیاستدان بنا کے تے عوام دے اگے کھڑا کر دتا. عوام نوں پہلاں خورے کجھ چر بھلیکھا رہیا ہووے گا کہ اوہناں دے اگے نچدے ٹپدے نویں قسم دے سیاستدان جیہڑے نویکلیاں گلاں سناندے نیں تے ہر دو منٹ بعد ایمانداری, ٹرانسپرنسی تے لوکائی دی بھلائی دے نعرے لاندے نیں شاید اوہ گزرے ورھیاں وچ ناکام ہوون والیاں حکومتاں توں بوہتے سیانے ہوون تے شاید واقعی اگلے بے ایمان تے ایہہ ایماندار ہوون. لیکن عوام روٹی نوں چوچی نہیں آکھدے, جے چھیتی نہیں تے کجھ دیر نال سبھ نوں پتہ لگ ہی گیا سی کہ نویں سیاستدان سیاستدان نہیں سگوں اک نوٹنکی نیں جنہاں نوں سیاستداناں دے سوانگ بھرکے تے عوام دے اگے کھڑا کیتا گیا اے. ایس عوامی سوجھ دی جھلک اساں 2018 دے الیکشن تے اوس توں پہلاں مسلسل چار سال دے “ایجی ٹیشن” وچ ویکھ لئی جدوں پاکستان دی تاریخ دی سبھ توں وڈی پروپیگنڈا کیمپیناں دا نشانہ بنے عوام نہ ایس نوٹنکی دے ایجی ٹیشن وچ رلے تے نہ 25 جولائی نوں ایہناں نوں ووٹ دتیاں. 25 تے 26 جولائی 2018 دی وچلی رات جو کجھ ہویا اوہ وی عوام نوں پتہ اے، کیونجے ووٹاں دی گنتی و
چ بیٹھے, ہارے تے جتے, تے ووٹ پاون والے سب 26 جولائی دے بعد اکو ای تھاں اکٹھے رہندے نیں تے کوئی راز ہمیشہ راز
نہیں رہندا.
ہن لوکاں نوں ایہہ وی پتہ اے کہ جے اوہناں دے روٹی روزگار دے مسئلے سنگین ہو گئے نیں تے ایہدا کنا کارن اگے کھلوتے نوٹنکی والے بھرا نیں تے کنا کارن پچھے بیٹھے سازشی بھرا نیں. عوام دے دکھ گالہہ مندا بولن نال مک سکدے تے کدی دے مکا دتے ہوندے, جے محبت ترلا کیتیاب ٹل سکدے تےایہہ کم وی عوام نے کر لیا ہوندا. اوہناں نوں پتہ اے کہ قبضہ بھاویں ڈھائی مرلہ رقبے دا ہووے تے بھاویں سارے ملک دا, قبضہ چھڈاون لئی گل لہو روڑھن تک جاندی اے. عوام ایہہ قیمت دین تےاجے تیار وی نہیں تے ناں ہی اجے کوئی اجیہے سورمے سامنے نیں جیہناں تے وساہ کر کے عام لوک وڈے فیصلے کرن بارے سوچن.
دانشور جے لوکاں نوں وڈے فیصلے دے بارت وچکوئی چنگی مت دے سکدے نیں تے ضرور دیون, نہیں دے سکدے تے فیر وی کوئی گل نہیں, عوام نے کدوں اوہناں توں کوئی آس رکھی اے.

اپنی رائے دا اظہار کرو

سرکار توں کوئی آس وی نئیں” ایک تبصرہ

  1. چنگی گل وَل اشارہ کیتا اے، تھوڑی محنت
    ہور ہو جاندی تے کیابات سی۔ فیر وی زبردست

تبصرے بند ہیں