506

ستو پیو،ستو کھاو تے سوں جاو

لکھاری، سہیل وڑائچ

ایہہ سیاسی لکھت نئیں اے،ایس لئی ایہدا کوئی سیاسی مطلب کڈھنا زیادتی ہووے گا،ایہہ موسمی یاں ودھ توں ودھ طبی کالم اے، جیہدا مقصد لوکاں دی قومی صحت نوں ٹھیک کرنا اے، سچ ایہہ وے کہ سیاست توں کدھرے وڈاہوکے قومی مسئلہ بن چکیااے ، ایس لئی اج کل سیاست کرن نئیں سگوں قومی ذہن تے صحت نوں ٹھیک کرن دا ویلا اے، اسیں قوم دے طور تے تگڑے ہوجائیے،تاں سیاست دا میدان فیر توں سجالواں گے۔
گرمی دا موسم شروع اے تے اوس وچ قومی صحت درست کرن لئی ستو پینا ضروری اے،فرہنگ آصفیہ تے نویں چھپن والی پنجابی لغت پلاک ڈکشنری مطابق بھنی کنک توں نکلن والےستوہوندے نیں۔ ستو وچ شکر ملا کے پین نال جسم اندر ٹھنڈ پے جاندی اے۔ ڈکشنری وچ ستو گھولن دے نام توں اک ہور اصطلاح وی لکھی اے، جیہدے اتے عمل ہوجائے تاں ملک دے سارے بحران ٹل سکدے نیں۔
ایس اصطلاح دا مطلب بے فیدا گل کرنااے۔ جے ملک نوں ٹھیک کرنا اے تاں سبھ ستو پیو،مگر ستو گھلوناں۔مطلب ٹھنڈے رہو، بے فیدہ کوئی گل ناں کرو۔ ایس شاندار نسخے نوں سامنے رکھدیاں میں تاں اپنے حصے دے ستو پی رہیا آں۔ تساں وی آس اے ایسراں ای کردے ہوو گے، جے ایسراں نئیں کررہے ہو تاں فوری ستو نوں خوراک بنالو، تاں جے تسیں ٹھنڈے رہو، ناں تہانوں گرمی لگے ناں غصہ آئے تے ناں ای تسیں پریشان ہوو۔

سیاست خان دے حوالے اے ،اوہ جانن تے سیاست جانے، معیشت وی خان دے حوالے اے،ا وہ جانے تے آئی ایم ایف جانے،ساڈا ایس معاملے وچ ستوگھولن نال کیہ فیدا؟ملک وچ کوئی مصیبت آئے تاں ایس نوں وی خان ای سنبھالے گا۔
رعایا داکم ستو پینا، ٹھنڈے رہنا تے پریشان نہ ہونا اے، باقی سبھ کجھ خان اتے وے،اوہو سبھ کجھ ٹھیک کرے گا۔

ویسے وی ستو پین وچ فیدہ ای فیدہ اے، آندے مہینے بجٹ اے، اگست ستمبر وچ توسیع یاں نویں تقرری دامعاملہ آجاوے گا، اینہاں حالات وچ ہرپاسے ستو پیون دی رسم جاری رہندی اے، کئی واری ایس عمل وچ ستو مک وی جاندے نیں۔ آندے مہینیاں دا سبھ توں وڈا فیصلہ ایہو ہووے گا تے سرکار دی پیشن گوئیاں ہوسکن گئیاں، تے پتہ چل سکے گا کہ کہدے ستو مکن گے۔ جدوں دے فوادجہلمی وزیرسائنس ٹیکنالوجی بنے نیں، نویکلی ایجاداں دا سلسلہ چل پیا اے۔ ستو دی نویں سرے توں بحالی وی اوہناں دی وزارت دا کارنامہ اے۔ ستو پہلاں وی ہوندے سن، لیکن سیاست نوں ٹھنڈا رکھن لئی ستو دا استعمال پہلاں کدے نئیں ہویا سی۔ اج توں سو ورھیاں پہلاں ایہہ گل عام سی کہ اک اجیہی دوائی بنانی چاہیدی اے جیہدے نال ہر روگ دا علاج ہوسکے۔ ایس خیالی دوائی نوں اکسیراعظم دا ناں دتاگیا۔

کئی اتائی تے حکیم اُوس نوں بناون دے دعوے کردے رہے مگر ایہہ سبھ جھوٹھ نکلیا۔ ہن وی کئی مجمے باز تے مداری نکی شیشی کڈھ کے دوروپے وچ ہر روگ دا علاج تے ٹھیک کرن دا دعوا کردے نیں۔ ہالے وی ایس جدید دور وچ اکسیر اعظم نوں مزاق وچ لیتا جاندا اے۔ کیوں جے سائنسدان ایس تصور نوں نری حماقت جان دے نیں۔ شکر اے وزارت سائنس نے ستو نوں باقاعدہ اکیسرِ اعظم دے طور اتے مشہور نیں کردتا۔ ہاں شبہ ایہو کیتا جارہیا اے پئی ستو دے راتوں رات مشہوری وچ کدھرے نہ کدھرے فواد جہلمی دا ہتھ ضرور اے۔
بوہت ودھ جانکاری رکھن والے ذریعاں دسیا پئی وزیراعلیٰ بزدار دی اُتے تھلے کامیابیاں دا راز وی ستو پین وچ اے۔ اوہ ہر سیاسی حملے دے جواب وچ ستو دا شکر بھریا پیالہ پیتندے نیں۔ بنی نالہ وی ستو پین دی حوصلہ افزائی کیتی جاندی اے۔ ایہہ اکلا کارن اے جیہڑا بزدار نوں بدلن نئیں دیندا۔اوہ جنے ستو پیندے نیں اونی ہی بنی نالی وچ اوہناں دی پتنگ اڈدی اے۔
ایس خطے دی تریخ وچ وی ستو پین ، ستو کھان، تے خوش رہن دی مستقل روایت موجود اے، دبائو ودھدا اے تاں ایہہ دبک جاندے نیں۔ آپ نوں خوش دسدے نیں۔ حاکم نوں بے فکر دیندے نیں۔ فیر اندر ای اندر سازش کرکے گھر ٹر جاندے نیں۔
ایہہ ستو کھان والے بڑے تیز نیں، پرویز مشرف دور وچ اندر ای اندر توں جمالی، شجاعت تے شوکت عزیز نوں بار بار بدلیا، زرداری دے زمانے وچ گیلانی تے پرویز اشرف نوں وی اندرونی طور اتے بدل دتا۔ نواز شریف ہٹیا تاں اندر ای اندر شاہد خاقان عباسی نوں لے آندا۔ ہن خان اے تے ستو پینے والے لوکیں ۔ ہالے تائیں لوک مہنگائی، بےروزگاری، ڈالر دی اڈان، روپیہ دی گراوٹ تے ہرکسے دی مایوسی اتے سبھ چپ نیں۔ ستو پیندے نیں سو جاندے نیں، کوئی ردعمل ظاہر نئیں کردے۔ کوئی جلوس کوئی احتجاج نئیں ۔ سوال ایہہ وے پئی لوکیں انج ای ستو پیندے رہن گے یاں فیر اندر ای اندر جو لاوہ پک رہیا اے اوہ کدے باہر وی نکلے گا۔
اپوزیشن جماعتاں لکھ اکٹھی افطاریاں کرلین اوہ وہ ستو پین لگ گئیاں نیں۔ جدوں تیجی دنیا دے سیاستدان جیل جان توں گھبران ، سرکار دیاں زیادتیاں اتے سمجھوتے کرن لگ پین۔ مصالحت دے راہ لبھن تاں اوہناں توں کس گل دی آس لائی جاوے۔ جے سچی سنجیدہ تے لوکاں دی سیاست کرنا چاہندے نیں۔ تاں ملکوں باہر اثاثے واپس پاکستان لے آون۔ سیاست پاکستان دی تے دولت باہر دے ملک ؟ گل سمجھ نئیں آندی۔
اپوزیشن جد تائیں اثاثیاں دا مسئلہ حل نئیں کردی، عوامی جت اوس دی نصیب وچ نئیں آوندی۔ ہوسکدا اے کسے ڈیل یا صلاصفائی نال اوس نوں کامیابی مل جاوے مگرعوامی فتح صرف اوس نوں ملدی اے جدے ہتھ نرے صاف ہوندے نیں۔ ہوسکدا اے فیصلیاں وچ ناانصافی ہوئی ہووے، ڈاھڈے طبقیاں نے اپنا کردار ادا کیتا ہووے لیکن فیر وی باہر اثاثے رکھن دا اخلاق کارن لبھنا تے لوکاں نوں ایس بارے تسلی دوانی اوکھی ہوجاوے گی۔
سرکار دا حال اپوزیشن توں وی بُرا اے۔ اوہناں کول نہ کوئی سوچ اے نہ کوئی تجربہ اے۔ اوہناں نوں نرا ستو گھولنا آندا اے۔ مطلب اوہناں دا کمال بے فیدا گلاں کرن وچ اے۔ موضوع کجھ ہوندا اے اوہ دلیلاں کسے ہور گل دیاں دیندے نیں۔ سرکار تے اپوزیشن دی صورتحال ایہہ وے تے فیر لوکیں ستو نہ پین تے ہور کیہ کرن؟
گالم گلوچ بریگیڈ نوں وی چاہیدی اے کہ اوہ ستو پین نوں اپنے نصاب دا حصہ بناون۔ ایہدے نال اوہناں دی بیماری نوں افاقہ ہووے گا تے اوہناں نوں دوجے لوک اونے ای بھیڑے وکھائی دین گے۔ آس اے کہ خان صاحب بلاول صاحب تے مریم صاحبہ سبھ ای ستو اتے لگے نیں ایسے کارن کسے فوری تبدیلی وی نئیں آندی وکھائی دیندی۔ ستو ستمبر اکتوبر تیک پیئے جاندے آں فیر اینہاں دا موسم مُک جاوے گا تاں تبدیلی اتے وچار کراں گے۔ ہالے سبھ ستو پیو،ستو کھاو، خوش رہوو تے سوں جاو۔۔

شکریہ روزنامہ جنگ

اپنی رائے دا اظہار کرو

2 تبصرے “ستو پیو،ستو کھاو تے سوں جاو

  1. ستو تے گڑ ماڑے لوکاں دے وسوں باھر اے۔۔۔صاف پانی نوں ترسدا مر جاندا اے

تبصرے بند ہیں