464

خطے وچ امریکی فوج تے جنگ دا خطرہ

امریکی کارروائی مگروں ایران دے جوابی حملے نال علاقے وچ اک نویں جنگ دے خطرے منڈلا رہے نیں۔

ایران دے گوانڈھی تے لاگے دے ملکاں وچ کنے امریکی فوجی تعینات نیں، ایس حوالے نال نیویارک ٹائمز نے اپنی اک رپورٹ وچ دسیا کہ سعودی عرب تے دوجی خلیجی ریاستاں وچ ایس ویلے45 ہزار توں 65 ہزار وچکار فوجی نیں۔ عراق وچ تعینات فوجیاں دی گنتی ساڑھے 5 ہزار توں 6 ہزار تے شام وچ 600 لاگے امریکی فوجی موجود نیں۔
لنگھے ورھے مئی وچ ایرانی حملیاں مگروں پینٹاگون نے خلیج فارس وچ 14 ہزار اضافی نفری گھل دتی سی، جنہاں وچ سعودی عرب والے ساڈھے 3 ہزار فوجی وی شامل نیں۔
خطے وچ جیہڑے امریکی فوجی اثاثے موجود نیں اوہناں وچ ویلے توں پہلاں چوکس کرن والے جہاز، سمندری نگرانی کرن والے جہاز، پیٹریاٹ ائیر اینڈ میزائل ڈیفنس بیٹریز، بی 52 بمبار طیارے،کیرئیر سٹرائیک گروپ، مسلح ریپر ڈرون تے انجینئرگ دے اہلکار شامل نیں۔
ایس دے نال ای تقریباً 2 توں ڈھائی ہزار امریکی فوجی ترکی وچ وی موجود نیں جنہاں زیادہ تر اوتھے دی اینجرلیک ایئربیس اتے تعینات نیں۔
امریکا اپنے نیٹو اتحادی ترکی نال وگڑے تعلقاں دے باوجود ایس اڈے دا استعمال مسلسل کردا رہیا اے، تے ایتھوں 2016 تے 2017 وچ داعش دے خلاف سیکڑاں فضائی حملیاں لئی طیاریاں نے اڑان بھری۔
خلیجی ریاست بحرین وچ امریکی نیوی دے ففتھ فلیٹ دا ہیڈکوارٹرز اے، جیہڑا خطے وچ جنگی جہازاں دی کمان سانبھ دا اے تے ایتھے 7 ہزار امریکی فوجی تعینات نیں۔
دوجے خلیجی ملکاں نال ایس ویلے خراب تعلقات رکھن والے ملک قطر وچ وی 13 ہزار امریکی فوجی العديدائیربیس اتے تعینات نیں۔ خطے وچ امریکی فضائی آپریشن دا ہیڈکوارٹرز وی ایہو فضائی اڈا اے۔

اپنی رائے دا اظہار کرو