273

جبری مذہب تبدیلی اتے پابندی لئی قنون دی لوڑ

بہت دکھ دی گل اے کہ قنون دی تابعداری دے عظیم پرچارک قائداعظم دا پاکستان ہن اجیہے ملک دے حیثیت نال پچھانیا جاندا اے جتھے بچیاں نال زیادتیاں ہوندیاں نیں، بال اغوا کیتے جاندے نیں، جبری ویاہ کر دتے جاندے نیں تے زور زبردستی”مذہب بدلوائے جاندے نیں تے ایس سبھ نوں ہن قاعدہ ہی منیا جاون لگیا اے۔ سب توں بوہتی فکر دی گل ایہہ اے بئی کوئی وی ایس وحشیاں والی سماجی برائی دے خلاف واج نئیں چک رہیا تے کوئی وی اوہناں غریباں دے نال نہیں کھلوندا جیہڑے ایس برائی دا نشانہ پئے بن دے نیں۔
دو ہندو بھیناں رینا تے روینا دے واقعے نے ساڈی امن پسند غیر مسلم کمیونٹی وچ تحفظ نہ ہوون دا احساس ودھا دتا اے۔ دھرو دا نشانہ بنن والے خاندان دے درد نوں اوہ ہی لوک جان سک دے نیں جیہڑے نسل، رنگ تے مذہب دے فرق نوں بھل کے انسانیت تے یقین رکھدے نیں۔
پہلے ترے دن تے پاکستان ہندو کونسل نے ایس مسئلے نوں اپنے طور نبیڑن دا آھر کیتا پر ناکامی ہوئی۔ فیر کونسل نے اک پنج نکاتی قرارداد منظور کیتی تے مینوں آکھیا بئی ایس مسئلے نوں پارلیمنٹ، میڈیا تے سماجی تنظیماں سنے ہر ممکن تھاں تے چکاں۔
میں ایس حساس معاملہ نوں ہمیشہ لئی نبیڑن واسطے قومی اسمبلی وچ اک قرارداد تے دو قنون دے مسودے پیش کرن دا فیصلہ کیتا۔ میں کئی سیاسی پارٹیاں دی “اقلیتی ارکان پارلیمنٹ”دا احسان مندا ہاں جیہناں ایس مسئلے تے میری قرارداد دی حمایت کیتی۔ ایہناں وچ مسلم لیگ نون دے ڈاکٹر درشن، تحریک انصاف دے لال ملہی، تحریک انصاف دی مس شنیلا روتھ تے پیپلز پارٹی دے رمیش لال شامل نیں۔
اک چنگے کم لئی میری مخلصانہ کوششاں دی سلاہنا کرن دی تھاں کجھ انتہا پسند لوکاں میرے خلاف پروپیگنڈا شروع کر دتا اے۔ ایس ویلے سوشل میڈیا وچ اک وڈیو کلپ پھیلائی کاندی پئی اے جیہدے وچ بعض لوک مذب دی اوٹ وچ مینوں تے میری جدوجہد نوں بدنام کردے پئےنیں۔
میری نظر وچ دنیا دے سارے مذہب اک جیہے محترم نیں، میں رسول اللہ صلی اللہ علیہ وسلم دا بہت زیادہ آدر کردا ہاں جنہاں دنیا دی پہلی بھلائی واد ریاست مدینہ دی نینہ رکھی۔ مدینے دی ریاست دے چارٹر وچ سارے شہریاں دے حقاں اتے زور دتا گیا۔
میں تے جدوں وی اجمیر شریف جانا واں اپنے ہتھاں نال دربار وچ جھاڑو ماردا ۔ لال شہباز قلندر تے شاہ لطیف بھٹائی دے مزاراں تےوی باقاعدگی نال جاندا واں۔
ایہہ اک سچی حقیقت اے کہ مذہب دا واسطہ دل نال اے تے دل نوں زور زبردستی کسے پاسے نہیں لایا جا سکدا۔ تواریخ ایہہ ہی دس دی اے بئی حے لوکاں تے کوئی شے ذبردستی تھوپی جاوے تے بعد وچ کسے ویلے اوہ مڑ اپنی پرانی تھاں تے چلی جاندی اے۔
افسوس دی گل اے کہ ساڈے سماج وچ کجھ گمراہ کیتے گئے لوک نکی عمر دی ہندو کڑیاں نوں نشانہ بنا کے اوہنان نوں ورغلان دا کم کردے پئے نیں۔ اہناں بالڑیاں دے تے اجے شناختی کارڈ تک نہیں بنے ہوندے۔جدوں اسیں 18 ورھیاں توں نکے بالاں نوں کار چلاون تے سگریٹ خریدن تے چھکن دی اجازت نہیں دیندے تے اسیں کچے ذہن دی بالڑیاں نوں مذہب بدل لین تے ویاہ کرن ورگے زندگی دے اہم ترین فیصلے کرن دی اجازت کیویں دے سکدے آں۔
نفسیات دے سیانیاں دا کہنا اے کہ ادھل کے جاون والیاں عورتاں دا سماج وچ رتبہ بری طرحاں متاثر ہوندا اے۔ اکثر وقوعیاں وچ اوہناں کول ایس توں اڈ راہ ہی کوئی نہیں رہندا کہ اوہ باقی ساری زندگی اغوا کرن والیاں دے نال ہی گزارن۔ کیوں جو اوہناں نوں پتہ ہوندا اے کہ گھر پرت جاون تاں وی سماج اوہناں نوں قبول کرن توں پچھانہہ ہٹ سکدا اے۔ ایہو جیہیاں بدقسمت عورتاں ساری حیاتی اپنے سگے رشتے داراں توں دور رہندیاں نیں۔
ایہہ پاکستان وچ مذہب دی جبری تبدیلی اتے پابندی لاون لئی قنون بناون دا مناسب ویلا اے۔ ایس کم لئی ایہہ وی ضروری اے کہ دوجے ملکاں وچ مذہب بدلن دے بارے وچ قانوناں بارے جانکاری لئی جاو۔ کجھ ملکاں وچ جے کوئی اپنا مذہب بدلنا چاہوے تے اوہناں نوں حکومت نوں ترے مہینے دا نوٹس دینا ہوندا اے۔ تے فیر اک ضلعی مجسٹریٹ دے سامنے پیش ہو کے مذہب بدلن دا بیان دینا ہوندا اے۔ دوجے ملکاں وچ کسے شہری نوں 18ورہے عمر توں پہلاں مذہب بدلن دی اجازت نہیں ہوندی۔
میری دل دی گہرائی توں ایہہ سدھر اے کہ ساریاں سیاسی جماعتاں ایسے (جبری مذہب تبدیلی، نکی عمر وچ ادھال کے جبری ویاہ کرن) جیہے شرم ناک کم نوں ہمیشہ لئی روک دین لئی قانون بنا کے لاگو کرن واسطے اکمٹھ ہوون۔ انسانیت دے ناں تے میں سارے پالیمینٹیرینز نوں بنتی کردا ہاں جو میری قرارداد دی متفقہ منظوری دواون تے میرے پیش کیتے قانون دے مسودیاں اتے سانجھی صلاح بناون لئی پارلیمنٹ دی کمیٹی بنائی جاوے۔ ہر سیاسی پارٹی ولوں ایس کمیتی وچ صلاح دیون لئی دو دو ممبر اک مسلم تے اک غیر مسلم شامل کیتے جاون۔
میں پورا بھروسہ اے کہ چنگی نیت نال ٹھیک رخ ول ٹر پئیے تے ہر مسئلے دا حل لبھ سکدا اے۔

لکھاری ڈاکٹر رمیش کمار ونکوانی قومی اسمبلی دے ممبر نیں تے پاکستان ہندو کونسل دے اچے سرپرست نیں۔ اوہناں دا ٹویٹر وچ پتہ @RVankwani اے
ایہہ لکھت “دی نیوز انٹرنیشنل” توں شکریہ دے نال لئی گئی۔
التھا: وسیم عظمت

اپنی رائے دا اظہار کرو

جبری مذہب تبدیلی اتے پابندی لئی قنون دی لوڑ” ایک تبصرہ

تبصرے بند ہیں