677

ایسی دی تیسی

لیکھ ، نعمان یاور

لاڑکانہ دے بھٹو نے جدوں ایران دی نصرت نال شادی کیتی، اوس نوں اندازہ نہیں سی کہ ایس رشتے نوں خاندان دے نال سیاست دی دنیا کیہ نام دیوے گی، بھٹو اک جاگیر دار گھرانے نال تعلق رکھن والا تعلیم یافتہ انسان سی،جنہوں اجیہیاں نکی موٹی گلاں نال کوئی فرق نئیں پیندا سی، ہاں ایہہ ضرور اے اجیہی گلاں کدے سیاست وچ بوہت زیادہ معنی اختیار کرجاندی نیں۔ جیویں قومی اتحاد دی تحریک وچ شریک زیادہ تر مذہبی لوکاں نے بھٹو اتے رجھ کے حملے کیتے،نال نصرت بھٹو نوں وی نشانہ بنائی رکھیا،
سیاست وچ اجیہے حملے ہمیش توں ہوندے آئے نیں، حملے کرن والے زیادہ تر مذہبی حلقے ای سن، جیہدا مطلب اے کہ اوہناں نے سماج وچ اخلاقی سدھار دا سارا بوجھ اپنے موڈھیاں اتے چکیا اے،اوہناں نے 72 ورھیاں وچ کیہ کارنامے کیتے، اوہناں نوں دسن لئی کوئی کہانی سناون یا قسم چاہن دی لوڑ نئیں اے۔ ایہہ حلقے آپ کدے ایہ منن گے وی نئیں، تے ایس دی لوڑ وی نئیں اے۔ کیوں جے سچ دا پرچار وی اوہناں ای کرنا اے، باقی سبھ تاں گنہگار نیں۔ جنہاں نوں توبہ دی لوڑ اے۔
اینہاں حلقیاں نے عورت دی حکمرانی دا شوشا وی خوب چکیا اوہ کارگر نہ ہوسکیا، بے نظیر نال وی ویسا سلوک کیتا، جے ایہہ لوکیں چنگے سلوک دا مظاہرہ کردے تاں اج لوکاں دی وڈی گنتی اوہناں نال ہوندی، لیکن دوجیاں دی ذات اتے حملے نوں وتیرہ بناون والے نرا اپنی ذات تے مفاد دی راکھی ای کرسکے۔
اوہ نرے اینہا کامیاب ہوئے پئی مخالف اتے حملیاں دا چلن غیر مذہبی سیاسی لوکاں وچ وی چوکھا لے آندا، مخالف زنانیاں ہوون یا فیر اوہناں دی گھروالیاں اوہناں نوں نشانہ بناونا مسئلہ نئیں۔
جے کلثوم نواز تے مریم نواز اپنے مخالفاں دی تنقیدی نگاہاں وچ رڑکدی رہیاں تے دوجے پاسے عمران خان دی زندگی نال جڑی زنانیاں وی اجیہے سلوک دی حق دار بنیاں۔ مقصد اصل سیاسی لوکاں دی “کردار سازی” ہوندا اے۔ اجیہی تنقید دوران کوئی حد وی نئیں ہوندی جتھوں تیک مرضی اپڑ جاو۔
کہندے سن سیاست وچ انسانیت نام دی شے مُکدی جارہی اے، کوئی اخلاقیات نئیں رہی، جیہدے منہ جو آیا کہہ دتا، ندامت، ملال، شرمندگی کس بلا دا نام اے، کدے محسوس نئیں کیتا، سیاست دے تقاضے بدلدے جارہے نیں، ہن سیاسی مخالفت وچ اک نواں ویہار آگیا، مخالف بیمار ہوجائے اوس اتے سوال چک دیو، ایہہ ضرور اے پئی ماضی وچ تے ہن وی بیماری نوں بہانے دے طور اتے ورتیاں گیا لیکن اسیں کیویں فیصلہ کرلیندے آں کہ بیماری نئیں محض ڈھونگ اے۔ ساڈے رویے اینے سخت تے کٹھور ہوندے جارہے نیں کہ مخالف سوچ رکھن والا دوست عزیز وی بُرا لگدا اے، اوس دی ناپسندیدہ گل زہر لگدی اے، ساڈے کن اپنی مرضی دی گل سنن دے عادی ہوگئے نیں۔ دوجیاں دے عیب کڈھن دی خوب عادت بنالئی اے، کدے وچ کیہ برائی اے اوس دی تلاش وچ رہندے نیں۔
ساڈی محفلاں وچ کسی دی اچھائی دا تذکرہ بوہت گھٹ ملے گا، تعریف تے سلاہنا دے الفاظ شاید بھل چکے آں، خاص کر سیاست وچ ستائش صرف اپنے لیڈر تے اپنے نظریے یا سوچ دی ہوندی اے، جے ویکھیا جاوے تاں انج لگدا اے کہ پورا سماج اک بدفعل لوکاں دا مجموعہ اے۔
دوجے دی مزاج پرسی، حال پچھنا، بیمار پرسی کرنا، تعزیت کرنا جیویں مجبوری دا عمل یا اک رسم بن کے رہ گیا اے، ساڈا ذھن بس ایس چکر وچ رہندا اے کہ کیویں ایسی دی تیسی کریئے۔ تاں جے ساڈے ذھن نوں سکون ملے۔ اسیں جس بند گلی وچ وڑدے جارہے آں،اوس دے اگے سدھرن دے امکان مزید گھٹ دے جارہے نیں، جے اساں آپ نوں ناں بدلیا ذھن تے دل نوں ناں وڈا کیتا تاں فیر “ایسی دی تیسی” دی سوچ سانوں وحشت زدہ بھیڑ وچ بدل دے گی۔

اپنی رائے دا اظہار کرو

2 تبصرے “ایسی دی تیسی

  1. نعمان صاحب ماشا اللہ بہت سوہنی لکھت اے۔
    اللہ سارے لوکاں نوں ایہو جئی سچی تے پاک سوچ تے ذہن دیوے۔

  2. sooch badalna aukha kaam je.par es di bahun lor je.doojean di aisi taisi karday kaarday apni aap aisie di taisi kardey pae ne.

تبصرے بند ہیں