سرفراز اک وار فیر مایوس کیتا

لاہور: سری لنکا نے پاکستان دے خلاف دوجا ٹی ٹوئنٹی میچ جت کے تن تین میچاں دی سیریز وچ 0-2 دی برتری حاصل کرلئی۔
سری لنکا ٹاس جت کے پہلاں بلے بازی دا فیصلہ کیتا تے متھے 20 اووراں وچ 6 وکٹاں دے نقصان اتے 182 رنز بنائے جہدے جواب وچ پاکستانی ٹیم 147 اتے ای ڈھیر ہوگئی۔
پروھنیاں ولوں بھانوکا راجاپاکسا نے 77 تے شیہان جے سوریا نے 34 رنز بنائے، پاکستان دے عماد وسیم، شاداب خان تے وہاب ریاض نے اک اک وکٹ حاصل کیتی جدکے سری لنکا دے تن کھڈاری رن آؤٹ ہوئے۔

محمد عامر تے محمد حسنین بڑے مہنگے گیند باز ثابت ہونے جنہاں نرے 4 اوورز وچ 40 تے 39 رنز دتے نالے کوئی وکٹ حاصل وی نہ کرسکے۔
سری لنکا ولوں دتے 183 رنز دے ہدف دا پچھا کردیاں پاکستان دی اننگز دا بوہت بھیڑا ہویا۔ فخر زمان 6 رنز بناکے آؤٹ ہوئے، مگروں بابر اعظم وی 3 رنزاں نال میدان توں باہر ٹرگئے۔ احمد شہزاد تےعمر اک وار فیر کجھ چنگا نہ کرسکے، احمد شہزاد 13 سکور بنائے جدکے عمر اکمل بغیر کوئی رن بنائے آؤٹ ہوئے ۔
عمراکمل نے صفر اتے آوٹ ہوون دا ریکارڈ وی بنالیا، دس واریاں وچ کوئی رن بنائے بغیر پہلی گیند اتے آوٹ ہوئے۔ سونے دی بطخ گولڈن ڈک لئی۔
سرفراز احمد دی کارگزاری بطورکپتان تے بلے باز بڑی مایوسی والی رہی، اوہناں دی منصوبہ بندی کدھرے وکھائی نئیں دتی۔
چیف سلیکٹر تے ہیڈکوچ مصباح الحق نوں میڈیا تنقید دا نشانہ بنایا، اوہناں دا آکھنا سی پئی تن ورھے دی خراب کارگزاری اک سیریز وچ کیویں چنگی ہوسکدی اے۔ ساڈے اتے نویں کھڈاریاں نوں میدان وچ لیاون دا دباو سی، اوس نوں سبھ ویکھ لیا۔