ٹک ٹاک ماڈل تے وطن دا چمکدا ستارہ

سوشل میڈیا لوکاں نوں اپنی گل دے اظہار دا موقعا دیندا اے، ایہدے فیدے وی نیں تے نقصان دی بندے پروا گھٹ ای کیتی اے۔ جے کسے دی کوئی نئیں سن دا اوہ ایس وسیلے سوشل میڈیا نوں چنگی طراں ورت دا اے۔ کجھ عرصے توں ایہہ اینہاں موثر جانیا جان لگیا پئی ایتھے آون والی ہر اطلاع نوں سچ ای سمجھیا جاندا اے۔ ایتھوں تیک کے سرکار مطلب وزیراں سگوں وزیراعظم نوں وی اپنی گل ایس راہیں میڈیا تے لوکاں تیک اپڑان دی لوڑ پیندی اے۔
اج کل نویں شے ٹک ٹاک آگئی اے، اوہدے اتے کوئی وڈیو سٹ دیو فیر اوس نوں ویکھن والیاں دا رش پے جاندا اے۔ بوہتے ویکھن والے اوہدے فالور تے ٹاپ ٹرینڈ وی کہواندا اے۔
دو کڑیاں جنہاں دا تعلق سرکار دی جماعت تحریک انصاف توں دسیا جاندا اے، اوہ جوان وی نیں تے سوہنیا وی، ایہہ کسے وی وڈیو نوں ویکھن لئی اک لوڑ ہوگئی دوجیاں اوہناں دی حرکتاں فیر اہم سیاسی بندیاں نال اپنیاں تصویراں تے وڈیو ٹک ٹاک کردیاں ، جیہدے نال اوہناں نوں دناں وچ چوکھی مشہوری مل گئی، اوہناں نوں ہور کجھ چاہیدا وی نئیں سی۔ وزیراعظم عمران خان توں لے کے فیاض چوہان نال وڈیو تے تصویراں انسٹاگرام اتے ٹک ٹاک کیتیاں۔ فیر اینہاں کجھ وکھرا کم کیتا، اینکر مبشر لقمان دی جہاز دے باہر کھلوکے تے اوس دے وچ بیٹھ کے فلم بنائی نال اوس نوں سوشل میڈیا اتے سٹ دتا۔ جیہدے اتے مبشر لقمان نوں ہورے کیہڑی گل بھیڑی لگی اوہناں حریم شاہ تے صندل خٹک خلاف پولیس وچ مقدمہ درج کرادتا پئی اوہناں جہاز وچوں قیمتی شیواں چوری کرلتیاں نیں۔
کڑیاں ڈاھڈے غصے وچ اک ہور وڈیو اپ لوڈ کیتی تے مبشر لقمان خلاف کھل کے گلاں کیتیاں آکھیا اوہناں آپ سانوں سدا دتا سی، اسیں اوہناں دی اصلیت دس دتی پئی اوہناں کول دو جہاز نیں، تاں جے اوہ غصے ہوئے۔ کڑیاں دا کہنا سی پلس نوں ساری حقیقت دس دتی اے۔
ایہہ کڑیاں کئی چینلاں اتے وی انٹرویو دے چکیاں نیں، اوہ کڑیاں نیں ایس توں ودھ کوئی خاص گل نئیں اوہ کوئی وڈی گل نئیں کردیاں کسے سیاسی یاں سماجی مسئلے اتے کوئی صلاح نئیں دیندیاں۔ صرف تفریح ۔
ہن اوہناں مبشر لقمان توں معافی وی منگ لئی نال ایس سبھ نوں غلط فہمی وی آکھ دتا ایس سبھ دے نال مبشر لقمان نوں وطن دا چمکدا دمکدا تارہ وی آکھ دتا۔
ایہہ سبھ ویکھ کے جیویں انج لگیا کوئی بال کھیڈدے کھیڈدے ، کسے وڈیاں دی چوپال وچ وڑ گیا تے اوہناں دی کوئی حرکت ویکھ لئی یاں گل سن لئی، ہن اوس بال نوں ایہہ سبھ بھگتنا پے رہیا اے۔ اوہناں پہلاں تاں سادگی وچ آکھ دتا پئی سانوں مرضی نال اپنی سواری اتے بٹھایا، اساں فرمائش نئیں کیتی سی، پر گل وگڑی تاں کہناں پے گیا، ساتوں غلطی ہوگئی کسے وڈے نال متھا لالیا۔
سوشل میڈیا دی ایہہ کہانی کجھ وکھری جئی اے۔ ویسے تاں ایہدے اتے کنٹرول شروع ہوگیا اے ، ایہہ کڑیاں تے وطن دے چمکدے دمکدے ستارے ہورے کسے دیہاڑے پکڑ وچ آجاون۔