ناراض متحدہ وزیر خالد صدیقی استعفے دا اعلان کردتا

متحدہ قومی موومنٹ پاکستان دے کنوینر تے وفاقی وزیر انفارمیشن ٹیکنالوجی خالد مقبول صدیقی نے وزارت توں استعفے دااعلان کر دتا اے۔
کراچی وچ میڈیا نمائندیاں نال گل کردیاں اوہناں آکھیا کہ پاکستان تحریکِ انصاف دی حکومت نے سرکار بناون ویلے کیتے وعدے پورے نئیں کیتے جس مگروں ہن مرکز سرکار وچ بیٹھن دا کوئی فیدا نئیں اے۔
خالد صدیقی دا کہنا سی کہ اوہناں دی جماعت نے تحریک انصاف نال تعاون دا جیہڑا وعدہ کیتا سی اوہ جاری رہے گا۔ چیتے رہوے کہ ایم کیو ایم کول دو وفاقی وزارتاں نیں،۔ خالد مقبول صدیقی تے فروغ نسیم جنہاں کول قانون دی وزارت اے۔
وفاقی حکومت نے ایم کیو ایم دی منگاں نوں درست قرار دیندیاں اپنی اتحادی جماعت دے سارے گلے شکوے دور کرن دا فیصلہ کرلیا۔ خالد مقبول صدیقی ولوں وفاقی کابینہ توں علیحدگی دے اعلان مگروں تحریک انصاف دی حکومت چوکس ہو گئی تے حکومتی ممبراں نے متحدہ رہنماؤں نال اک وار فیر رابطے شروع کردتے نیں۔