ججاں دے خلاف ریفرنس گھلن تے احتجاج۔ زاہد فخر الدین جی ابرہیم ایڈیشنل اٹارنی جنرل دے عہدے توں استعفی دے دتا

اسلام آباد(سجن رپورٹ) پاکستان دے ایڈیشنل اٹارنی جنرل زاہد فخر الدین جی ابراہیم نے سپریم کورٹ تے سندھ ہائی کورٹ دے ججاں دے خلاف صدارتی ریفرنس دائر کرن دی اطلاع اتے اپنے عہدے توں استعفی دے دتا اے۔
زاہد فخر الدین جی ابراہیم نے صدر دے ناں لکھے گئے اپنے استعفے وچ آکھیا بئی میڈیا وچ ایہہ خبراں آ رہیاں نیں کہ سرکار نے سپریم کورٹ تے سندھ ہائی کورٹ دے ایماندار ججاں دے خلاف صدارتی ریفرنس گھل دتا اے۔ اوہناں آکھیا بئی کئیں سرکاری عہدیداراں نے وی ایہناں خبراں دی تصدیق کیتی اے کہ صدر نے ریفرنس جوڈیشل کمیشن نوں گھل دتے نیں۔ زاہد فخر الدین جی ابراہیم نے اکھیا کہ اوہ ججاں دے احتساب کے حامی نیں پر جیہڑے ججاں دے خلاف ایہہ ریفرنس گھلے گئے نیں اوہناں دے خلاف کئیں واری سرکاری عہدیدار گلاں کر کے اپنی سوچ دا دس چکے سن۔

زاہد فخر الدین جی ابراہیم سندھ دے سابق گورنر تے سابق چیف الیکشن کمیشنر فخر الدین جی ابراہیم دے پتر نیں۔ اوہناں نوں پی ٹی آئی دی سرکار نیں کراچی وچ اپنا ایڈیشنل اٹارنی جنرل لایا سی