آٹا بحران تے چینی دی قیمت وی ودھ گئی

ملک بھر وچ آٹے دے مُل وچ وادھا ہوون مگروں کھنڈ وی مہنگی کردتی گئی، جیہدے کارن لوکیں ڈاھڈے پریشان ہوگئے نیں۔
سندھ، بلوچستان تے پنجاب وچ فی کلو چینی 5 روپے اضافے نال مہنگی کردتی گئی جیہدے کارن مٹھیائی، کیک، بیکری دی شیواں تے دوجی مٹھی شیواں دے مُل 100 توں ڈیرھ سو روپے تیک ودھا دتے گئے نیں۔
کراچی وچ چینی دی قیمت 4 روپے اضافے مگروں فی کلو 78 روپے ہوگئی کوئٹہ وچ 5 روپے اضافے نال 80 روپے وچ ویچی جارہی اے۔
لہور وچ فی کلو کھنڈ دا مُل ڈھائی روپے ودھا کے 80 روپے دی ویچی جارہی اے۔ ایسراں پشاور وچ چینی 73 روپے فی کلو سی، جیہڑی 5 روپے وادھے مگروں 78 روپے ہوگئی اے۔
وزیر اعظم عمران خان نے آٹے دی قیمت وچ اضافے دا نوٹس لیندیاں ایس بحران نال نبڑن لئی وڈے آپریشن دی ہدایت کیتی اے جدکہ اقتصادی رابطہ کمیٹی نے تن لکھ میٹرک ٹن گندم درآمد کرن دی منظوری دے دتی اے۔