(اسلام آباد سجن ڈیسک ) ملک دے کمرشل بینکاں نے اک واری فیر اے ٹی ایم توں پیسے کڈھن والیاں اتے وادھو چارجز دا بھارلاگو کر دتا اے ۔ اک ویروے موجب بینک ، اے ٹی ایم ورتن والے اکاوئنٹ ھولڈراں کولوں ھن 23.44 روپے حاصل کرسی اس توں پہلاں اک ٹرانزیکشن اتے 18.50 روپے کٹے جاندے سن ۔ کجھ بینکاں نےاپنے کسٹمرز توں چارجز وصول کرنا شروع کردتے نیں جدکہ کجھ بینک وی آون والے ہفتیاں وچ اس پالیسی نوں لاگو کر دیسن ۔ کمرشل وچ یونائیٹڈ بینک،عسکری، بینک الحبیب، میزان، پنجاب بینک، ٹیلی نار مائیکرو فنانس بینک تے نیشنل بینک شامل نیں جنہاں نے اپنے چارجز دے شیڈول نوں اپ ڈیٹ کیتا اے ۔ چیتے رھے کہ اجیئے چارجز وچ اک وڈا حصہ 1- لنک سوئچ دا اے ۔ ملک دے وڈے حبیب بینک، ایم سی بی تے بینک الفلاح نے اجے تائیں چارجز دے شیڈول نوں اپ ڈیٹ نہیں کیتا، ایھناں بینکاں نے اپنے چارجز 18.50 روپے توں ودھا کے 18.75 کردتے نیں۔ پاکستان وچ، 35 کمرشل تے مائیکرو فنانس بینک 17,000 اے ٹی ایم چلارہے نیں، جنوری توں مارچ 2022 تائیں ایھناں بینکاں نے اے ٹی ایم دے ذریعے 2.4 ٹریلین دی کمائی کیتی اے ۔
138
