پاکستان، انڈیا اٹاری سرحد اتے تجارت بند،ہزاراں متاثر

رپورٹ بی بی سی
انڈیا دے کنٹرول ہیٹھ کشمیر وچ لنگھے ورھے پلوامہ حملے مگروں انڈیا تے پاکستان وچکار تجارتی تعلق ختم ہوگئے۔ دوہاں ملکاں نے اک دوجے نوں معاشی طور اتے نقصان پہنچان لئی بعض سخت فیصلے کیتے ، انڈیا نے پاکستان توں درآمد کیتی جان والی ساری شیواں اتے 200 فیصد محصول ودھا دتا تے ‘موسٹ فیورڈ نیشن’ دی حیثیت نوں ختم کر دتا جدکہ پاکستان نے انڈیا نال آپسی تجارت نوں ختم کر دتا۔
پلوامہ حملے نوں اک سال دا ویلا لنگھ گیا اے تے بھارت نے ریاست پنجاب وچ اٹاری سرحد اتے جیہڑی جڑی ہوئی چیک پوسٹ انٹیگریٹڈ چیک پوسٹ قائم کیتی سی، اوتھے انڈیا پاکستان وچکار تجارت بالکل ناں ہوون برابر اے۔
ایس نال ناں صرف دوہاں ملکاں دے کسٹم ڈیوٹی وصولی نوں تقریباً ختم کر دتا اے بلکہ ایس نال انڈیا تے پاکستان دے ہزاراں باشندیاں دا روزگار وی ڈاھڈا متاثر ہویا اے۔
تاجراں کول اپنے کاروبار نوں چلاون دے دوجے راہ ہوندے نیں، لیکن ہزاراں قلی، ڈھابے دے مالک تے ڈارئیوراں دا روزگار چلا گیا اے۔
اٹاری گاؤں دے اک قلی گردیپ نے بی بی سی نوں دسیا کہ اوہناں دی حیاتی دوہاں ملکاں وچکار تجارت بند ہوون کارن بری طرح متاثر ہوئی اے۔ گردیپ کم دوران زخمی ہو گیا سی، لیکن اوس دے بھائی نوں اوہدے پرمٹ اتے کم کرن دی اجازت مل گئی جیہڑا تجارتی تعلق ختم ہوون مگروں گھر چلان لئی نکے موٹے کم کردا اے۔

رمیش آئی سی پی لاگے اک چھوٹا ڈھابہ چلاندا اے، اوس دسیا کہ ‘جد انڈیا پاکستان وچکار تجارت بند ہوئی تاں میں اک دیہاڑ وچ تقریباً 2700 دی سیل کرلیندا ساں لیکن ایس مگروں مشکل نال 200 روپے دا وی کاروبار نئیں کر پاندا تے ایتھے ڈھابہ چلانا مشکل ہو رہیا اے۔’
انڈین کسٹمز دے 19-2018 دے اعداد و شمار مطابق آئی سی پی توں 41266 ٹرکاں ذریعے 2120754 میٹرک ٹن مال پاکستان توں بھارت درآمد کیتا گیا جیہدی مالیت 32۔262 کروڑ روپے سی جدکہ 2268 ٹرکاں اتے 34134 ٹن سامان پاکستان گھلیا گیا جس دی مالیت 29۔612 کروڑ روپے سی۔