ن لیگی ووٹ دیندے نیں،باہر نئیں نکلدے،خواجہ آصف

ٹی وی رپورٹ: رہنما مسلم لیگ (ن) خواجہ آصف نے آکھیا اے کہ آرمی ایکٹ وچ ترمیم دی حمایت دی ہدایت لندن میٹنگ وچ سات دسمبر نوں قیادت ولوں دتی گئی سی، لندن میٹنگ وچ حلف لیتا گیا سی کہ ایس دی تفصیل ایتھوں باہر نئیں جاوے گی۔
خواجہ آصف نے آکھیا کہ نواز شریف ہسپتال وچ سن تاں اک دن وی 100 توں ودھ بندے جمع نئیں ہوسکے، لہور توں مارچ لنگھنا سی تاں ساڈے لیگی کارکن اوہدے وچ شریک نئیں ہوئے، سوشل میڈیا تے ووٹ دیون دے حق تیک لوکیں حمایت کردے نیں لیکن باہر نئیں نکلدے۔
سوشل میڈیا تنقید لئی آسان فورم اے، جمہوریت دی بالادستی خاطر لاکھاں دی گنتی وچ لوکاں نوں سڑکاں اتے نکلنا ہووے گا۔ مہنگائی آسمان تیک اپڑگئی اے۔ ایس ہور ودھنا اے۔ لوکاں دا بھیڑا حال ہوگیا اے۔
سروسز ایکٹ بارے گل کردیاں خواجہ آصف آکھیا آرمی ایکٹ ترمیم دی حمایت کرن نال ساڈے نظریے نوں کوئی نقصان نئیں اپڑیا، جدوں میں دسیا کہ آرمی ایکٹ دی ترمیم دی حمایت دا فیصلہ نواز شریف دی ہدایت تحت کیتا گیا، تاں پارٹی میٹنگ وچ میرے اتے تنقید کیتی گئی لیکن رانا تنویر، خرم دستگیر، پرویز رشید تے ایاز صادق ایس گل نوں منے پئی میں اپنے پلے توں کجھ نئیں آکھ رہیا۔ جو کجھ کہیا اوہ پارٹی قیادت دا حکم سی، آرمی ایکٹ اتے جو فیصلہ میاں نواز شریف کیتااوس اتے عمل کیتا۔ جے اوہ ایس دے خلاف کرن نوں آکھ دے فیر وی فیصلے اتے عمل کیتا جاندا۔
خواجہ آصف آکھیا کہ لنگھے 30 ورھیاں وچ کدے پارٹی فیصلیاں خلاف کھل کے گل نئیں کیتی، بھانویں مینوں اوس نال اختلاف ای کیوں ناں ہوندا رہیا ہووے۔ مسلم لیگ نون دے 84 وچوں 73 ممبراں نے ووٹ کاسٹ کیتا،چار چھٹی اتے سن،سعدرفیق، شاہد خاقان، چوہدری عاصم اقبال نئیں آئے۔
اوہناں آکھیا کہ جماعت نے جو فیصلہ کیتا درست سی، میں ایس دی مکمل حمایت کردا ہاں، جے میں آرمی ایکٹ وچ ترمیم دا مخالف ہوندا تاں ووٹ ناں پاندا، شہبازشریف کوئی فیصلہ نواز شریف دی مرضی بغیر نئیں کردے۔