تیز گام وچ اگ لگن نال 74 موتاں، 40 زخمی

رحیم یار: لیاقت پور دے لاگے تیز گام ایکسپریس وچ گیس سلنڈر اکو سار پھٹ گیا، جیہدے کارن تن بوگیاں وچ اگ لگ گئی، کئی بندے موقعے اتے رب نوں پیارے ہوگئے، زخمیاں نوں اسپتال اپڑایا گیا۔

فوج سنے دوجے اداریاں دی امدادی ٹیماں موقعے اتے اپڑگئیاں نیں۔ ریلوے دے ذمہ دار افسراں دسیا پئی زیادہ موتاں چلدی ٹرین تو ں چھال مارن کارن ہوئیاں، وزیر ریلوے حادثے دی ذمے واری مسافراں اتے پادتی، جنہاں کھان پکان لئی ٹرین وچ گیس دا سلنڈر ورتیا۔

جمعرات دی سویرے کراچی توں راولپنڈی جان والی تیز گام ایکسپریس وچ رحیم یار خان دے علاقے لیاقت پور لاگے حادثہ پیش آیا ، ڈی پی او دسیا کہ حادثے وچ مرن تے پھٹڑہوون والیاں نوں ٹی ایچ کیو لیاقت پور تے بہاول پور دے ہسپتالاں وچ گھل دتا گیا جدکہ اگ نوں بجھا لیا اے۔
تن بوگیاں وچ تقریباً 200 توں ودھ بندے سوار سن، جنہاں وچوں اک بوگی وچ 78 ، دوجی وچ 77 تے بزنس کلاس وچ 54 مسافراں دی بکنگ سی، حادثے مگروں کئی بندیاں دی سڑیاں لاشاں کڈھیاں گئیاں۔
وزیر ریلوے دا کہنا اے ایس واقعے وچ ریلوے دی غلطی نئیں سگوں مسافراں دی غلطی اے، مسافراں ناشتہ بنان لئی سلنڈر بالھیا جیہدے نال چلدی گڈی وچ اگ لگ گئی۔ مسافر گڈی وچ سلنڈر کیویں لے گئے ایہدی تحقیقات کیتی جاوے گی۔
چیئرمین ریلوے دسیا کہ انسپکٹر آف ریلوے دی سربراہی وچ تحقیقات دا حکم دے دتا اے، اوہ ویکھن گے پئی ٹرین وچ سلنڈر لے جاون دی اجازت کیویں دتی گئی۔