آزاد کشمیر سنے پنجاب تے خبیرپختونخوا دے کئی شہراں وچ شدید زلزلے نال مواصلاتی نظام تباہ ہوگیا گھٹوگھٹ 23 بندیاں دی جان چلے گئی تے 300 توں ودھ شہری زخمی ہوگئے۔
امریکی جیولوجکل سروے مطابق 4 وجے آن والے زلزلے دی شدت 5.8 سی تے اودھی گہرائی 10 کلومیٹر سی، اوس دا مرکز جہلم دے شمال وچ آزاد کشمیر تے پنجاب نوں وکھ کرن والی سرحد توں 22 اعشاریہ 3 کلومیٹر دور سی۔
ایم ڈی میٹرولوجی محمد ریاض نے اے ایف پی نوں دسیا زلزلے نال پنجاب تے خیبرپختونخوا دے کجھ علاقے متاثر ہوئے جدکہ سبھ توں ودھ نقصان میرپور آزاد کشمیر وچ ہویا اے جتھے مواصلاتی نظام درہم برہم ہوگیا اے۔
میرپور دے ڈپٹی انسپکٹر جنرل پولیس سردار گل فراز خان دا کہنا اے کہ زلزلے کارن 23 بندے جاں بحق ہوئے جنہاں وچ تن بال وی سن ایس توں علاوہ 300 زخمی ہوگئے ہیں۔
وزیراعظم عمران خان تے آرمی چیف جنرل قمر جاوید باجوہ نے آزاد کشمیر وچ زلزلے نال جانی و مالی نقصان اتے گہرے دکھ دا اظہار کیتا تے امدادی کم فوری شروع کرن دی ہدایت کیتی۔
آزاد جموں و کشمیر دے وزیراعظم راجا فاروق حیدر مقبوضہ کشمیر بارے کجھ پروگراموں وچ شرکت لئی لہور آئے سن اوہ دورہ مکاکے فوری واپس ٹر گئے۔
