نویں دلی: مقبوضہ کشمیر دی خصوصی حیثیت ختم کرن مگروں مودی سرکار ملک وچ مسلماناں اتے زمین تنگ کرنی شروع کردتی، آسام وچ آباد لکھاں مسلماناں دی شہریت ختم کرکے 19 لکھ دی لسٹ جاری کردتی، جیہدے مگروں کسے وڈے ردعمل توں بچن دا ڈرامہ کردیاں پوری ریاست وچ سکیورٹی سخت کر دتی اے۔
آسام دی نیشنل رجسٹر آف سٹیزن این آر سی دی لسٹ وچ بنگال توں آون والے زیادہ مسلمان تے ہندو نیں، جنہاں دے بارے آکھیا گیا کہ اوہ غیرقنونی طور اتے پنجا ورھیاں توں ریاست وچ رہ رہے نیں۔ اج 31 اگست نوں ایہہ لسٹ جاری کردتی گئی اے، ایس وچ لوکاں نوں خصوصی ٹربیونل وچ فیصلے نوں چیلنج کرن دا حق دتا اے۔ لسٹ وچ حکام نے کئی پیڑھیاں توں وسن والے لکھاں لوکاں نوں شامل کیتا اے۔ آسام وچ بنگلہ دیش تے دوجے گوانڈھی ملکاں توں آکے آباد لوک شامل نیں۔
3 کروڑ 29 لکھ آباد وچوں 19 لکھ 6 ہزار665 لوکیں شامل نیں، جنہاں دی اکثریت سرکاری دفتراں وچ جاکے اپنے وڈیاں دے نام ووٹر لسٹاں تے دوجے کاغذاں وچ لبھنے شروع کردتے نیں۔
394
