جے بچ نہ سکے تاں سانوں یاد رکھنا

بھارت نے کشمیر وچ ان متھے ویلے تیک کرفیو نافذ کردتا اے جس دے کارن 70 لاکھ کشمیری اپنے گھراں وچ ڈک دتے گئے نیں۔
بھارتی سرکار انٹرنیٹ سروس ، ٹیلی فونز سروس بند کردتی اے ، لوکاں وچ ہور خوف ودھ گیا اے۔
قبضے والے بھارتی کشمیر وچ انٹرنیٹ بند ہوون توں پہلاں لوکاں اپنے سنہے جگت دی انسانیت نوں کجھ ایسراں گھلے نیں
کشمیر دی زنانی وکیل شہریار خانم دا آکھنا اے کہ ’ اسیں نئیں جان دے کل ساڈے نال کیسا ہووے گا، دل بوہت بوجھل اے، دوستو جے اسیں بچ نہ سکے تاں ساڈے چنگی گلاں تے اپنی دعاواں وچ سانوں ضروریاد رکھنا‘۔
کشمیر دی تبینہ انجم نے وادی دی صورتحال توں جانکاری دیندے دسیا کہ اوہ ہن وی والدین، رشتہ داراں تے دوستاں نال رابطہ نہیں کر پا رہیاں۔
’مشکل ویلے وچ اسیں ایہدے توں وی برا وقت ویکھیا اے لیکن 3 دہائیاں دی توڑبھن احتجاج وچ پہلاں واری لینڈلائن فون وی بند کردتے گئے نیں۔
زارا بخشی ’میرے ماں پیو، دوست تے خاندان والے نال اخیرلے ویلے فون کال کررہے نیں، اوہناں نوں معلوم نئیں رات لنگھن مگروں دن چڑھن تے ساڈی آپس وچ گل ہوسکے گی یاں نئیں۔
سری نگر شہر دے میئر جنید عظیم مٹو نے کشیدہ صورتحال بارے ٹوئٹ کردیاں آکھیا کہ ’یقین نال نئیں کہہ سکدا کہ کل کیہ ہووے گا، لیکن کشمیر تے کشمیری لمے چرتوں برداشت نہ کرن والی صورتحال ویکھ رہے نیں۔ ایہہ اوہناں نوں بار بار برداشت کرنا پیندی اے‘۔