اپوزیشن دا 14 سینیٹرز نوں سامنے لیاون دا اعلان

اسلام آباد: چیئرمین سینیٹ صادق سنجرانی خلاف تحریک عدم اعتماد ناکام ہوون مگروں شہباز شریف دی اگوائی ہیٹھ اپوزیشن لیڈراں دا ہنگامی اکٹھ ہویا، جیہدے وچ فیصلہ کیتا گیا کہ جنہاں 14 سینیٹراں دھوکھا دتا، اوہناں نوں ننگیاں کیتا جاوے گا۔
اجلاس مگروں چیئرمین پیپلز پارٹی بلاول بھٹو زرداری تے دوجے آگواں نال اک پریس کانفرنس کردیاں مسلم لیگ ن دے صدر شہباز شریف آکھیا پارٹی پالیسی توں مکر جاون والے ممبراں خلاف کرڑی کارروائی دا فیصلہ کیتا گیا اے۔
شہباز شریف دا کہنا سی جنہاں 14 ممبراں اپنا ضمیر ویچیا، اوہناں نوں لبھیا جاوے گا۔ اسیں اگلے ہفتے آل پارٹیز کانفرنس (اے پی سی) بلاواں گے ۔
بلاول بھٹو نے آکھیا کہ ایہہ سینیٹ اتے حملہ اے جیہدا حساب لیتا جاوے گا، اسیں اپنی جماعت وچ وی ویکھاں گے اوہ کون سن جیہڑے دباو ہیٹھ آگئے۔ کون سن جنہاں اپنے ضمیر نوں ویچ دتا۔ 14 سینیٹرز اپنی پارٹی دی پیٹھ تے چھرا گھوبیا اے، اسیں اینہاں نوں نئیں چھڈاں گے۔
ایس توں مگروں پیپلزپارٹی دے سارے سینیٹراں اپنے استعفے بلاول بھٹو نوں پیش کردتے، جیہدے اوتے اوہناں آکھیا کہ چھیتی پتہ لگ جاوے گا، کیہدے نال کس نے رابطہ کیتا۔