وزیراعظم عمران خان تے اپنا کامیاب دورہ امریکا کرکے دیس پرت آئے، اوتھے دنیا دے طاقتور ملک دے صدر ڈونلڈ ٹرمپ نال ملاقات کیتی، وڈیاں وڈیاں گلاں تے خیالاں دا وچار وٹاندرا ہوئیا، میڈیا اگے وی سوالاں دے جواب دتے۔ ٹرمپ آکھیا پاکستان تے انڈیا وچکار مسئلہ کشمیر اتے اوہ وچولے دا کردار نبھاون نوں تیار نیں۔ ایس لئی بھارتی وزیراعظم نریندر مودی وی اوہناں نوں درخاست کیتی سی۔ ایس خبر نوں وڈھی اہمیت ملی، کشمیر اتے امریکا ثالثی دے پیشکش کردتی۔ کجھ چر مگروں پہلاں انڈیا دا میڈیا بول پیا، اوہناں دی خارجہ وزارت دے ترجمان وی صاف کہہ دتا، پئی مودی نے ٹرمپ نال اجیہی کوئی گل نئیں کیتی۔ ہن ویکھیا جاوے تاں پاکستان دا تے ایہدے وچ کوئی سروکار نئیں۔ کون جھوٹھ بول رہیا تے کیہڑا اپنی پوزیشن ودھا رہیا اے۔ اگلے دیہاڑ بھارت دی پارلیمنٹ وچ واواہ سرکار دی پچھ ہوئی، کھل کے کوئی جواب نہ آیا۔
واشنگٹن وچ اک بھارتی صحافی ٹرمپ دے مشیر لیری کوڈلو نوں جد ایہہ گل پچھی اوس وی اپنے صدر دی صفائی پیش کیتی پئی اوہ کدے اپنے پلے توں کوئی گل نئیں کردے، نالے اوس کجھ غصہ وی کیتا۔
ہن آجاو اوس توں ایک دیہاڑ پہلاں جدوں ٹرمپ عمران ملاقات ہوئی اوس توں اگلا دیہاڑ وڈے میڈیا گروپ سی این این اپنی اک رپورٹ وچ دسیا پئی صدر ٹرمپ جدوں توں سرکار سانبھی اوہناں وڈے وڈے دعوے تے جھوٹھ تے رجھ کے پھڑاں ماریاں نیں، جنہاں نوں نہ صرف میڈیا ننگیاں کردا رہیا سگوں امریکی لوکیں وی کافی حد تیک جان چکے تے ایس عادت توں اک وی چکے نیں۔
رپورٹ دسیا کہ ایس ہفتے دوران ای ٹرمپ 61 جھوٹھ تے غلط دعوے کیتے، اوہ گل نوں ودھا چڑھا کے بیان کردے نیں، اصل وچ انج ہوندی نئیں، لنگھے ہفتے نارتھ کیرولینا دی ریلی وچ 21 ایس توں مگروں تقریر دوران 20 فیر کابینہ دے اجلاس وچ 15 اپنے ٹویٹر اتے 6 وکھری رپورٹاں وچ 5 جھوٹھ بولے۔ جیہڑے ریکارڈ اتے نیں۔
سبھ توں دلچسپ گل عمران خان دے دورے توں پہلاں جہادی تنظیم دے آگو حافظ سعید دی پاکستان وچ گرفتاری نوں انج اپنے ٹویٹر وچ دسیا جیویں ایہہ کوئی اسامہ بن لادن ورگی تلاش ہووے۔ دوجے امریکی صدراں وانگ ٹرمپ وی اک فاتح کمانڈرانچیف بنن دا مظاہرہ کیتا تے آکھیا دس ورھیاں دے لمی تلاش تے لنگھے دو ورھیاں توں دباو پاون مگروں ممبئی حملیاں وچ ملوث ملزم نوں پاکستان پھڑلیا۔
رپورٹ دسیا کہ سبھ جان دے نیں، گل ایسراں نئیں، حافظ سعید کدھرے لکیا نئیں سی، اوہ پاکستان دے شہر لہور وچ آزادی نال ٹردا پھردا ، مسیتاں وچ خطبے دیندا، اوباما نے اوس دے سر دامل جدوں اک کروڑ ڈالر لایا تاں اوس آپ کہہ دتا سی، مینوں ایہہ رقم دے دیو، میں تہانوں اپنی آوا جاوی بارے اطلاع دے دیواں گا۔ ٹرمپ دے ایس ٹویٹ اتے وی ڈاھڈا مخول بنیا۔
گل ایہہ وی پئی ڈونلڈ ٹرمپ پہلاں کیہ کردے رہے ہن تاں اوہناں اپنی محنت نال ویکھن نوں دنیا دی بادشاہی حاصل کرلئی، پر گلاں وی کجھ رنگیلے بادشاہواں ورگی کررہے نیں۔ پاکستان اوہناں دی ثالثی والی گل اتے کن رکھ لئے ، دوجے پاسے انڈیا منن نوں تیار نئیں وکھری گل اے مودی ہالے منہ نئیں کھولیا۔ لگدا انج ای اے، گل کجھ ہور نکلنی اے، جیویں کشمیر اتے ماضی وچ وی ہوندا آیا۔
مسئلہ حل ہوندا یاں نئیں، پاکستان نال امریکا دے تعلق کیہ ہوندے نیں، ہالے ایس نوں وی اک پاسے رکھ چھوڑ دے آں۔ صدر ٹرمپ تے عمران خان دی ملاقات دوہاں ملکاں دے لوکاں نوں کیہ سنیہا دے گئی۔ ایہہ وی من لیا پئی سیاست وچ وعدے، دعوے نعرے چل دے نیں، پر کجھ تاں سچ ہووے گا۔ عمران خان وی کئی ملکاں توں امداد لین مگروں اوتھے مدد لین اتے لعنت پادتی۔ ہوسکدا اے امریکی امداد نوں بھیڑا جان دے ہوون۔
فیروی جو کجھ اے، اک گل اعتبار تے وساہ دی ہوندی اے، اوہ لوکاں دا سیاستداناں اتے مکدا جاندا اے، ایہہ کوئی چنگی گل نئیں، کدی من کے ٹرئیے، تے کنوں جھوٹھا آکھیے، انج لگدا جیویں اسیں آپ ای جھوٹھے آں۔ باقی سبھ سچے۔
![](https://sajjanlahore.com/wp-content/uploads/2019/07/5d2f736286c4e-800x320.jpg)