عید دا چن،فیر پھڈا،سائنس وی مسئلہ حل نہ کرسکی

پاکستان نے دوعیداں مناون دی رویت نہ چھڈی، اک دیہاڑ ے عید مناونا لوکاں دا سفنا ای رہ گیا، ایس وار تبدیلی سرکار دے سرکڈھویں وزیرسائنس ٹیکنالوجی فوادچودھری قمری کیلنڈر لیاون تے چن ویکھن دا مسئلہ حل کرن دادعواکیتا۔ اوہناں دس ورھیاں دے رمضان ، عید دی تریخاں وی دے چھڈیاں

مفتی پوپلزئی ولوں اک وار فیر شوال(عید )داچن پہلاں ویکھن دااعلان کردتا۔ خیبرپختونخوا سرکار نے اوس دے اطلاعات دے وزیر شوکت یوسفزئی مطابق قبائلی علاقیاں دے نویں ضلعیاں دے صوبے وچ شامل ہوون پاروں مفتی پوپلزئی دے اعلان اتے اک دیہاڑپہلاں عید منالئی، ایس نوں وزیراعظم عمران خان دی آشیرباد حاصل سی۔
منگل نوں مفتی منیب دی رویت ہلال کمیٹی کراچی بیٹھ کے چن ویکھیا تے بدھ نوں عید دا اعلان کردتا۔ نالے اوہناں آکھ دتا پئی وزیراعلیٰ کے پی محمود خان تے وزیراطلاعات شوکت یوسفزئی سن لین، دین کسے 18 ویں یاں 28 ویں ترمیم تھلے نئیں لگیا۔ اوہناں حیرت دسی پئی صوبائی سرکار اپنی مرکزی سرکار نوں نئیں منیا، انج تریخ وچ پہلاں واری ہویا۔

فوادچودھری آکھیا پئی منگل نوں عید منا کے خیبر پختونخوا سرکار نیں جھوٹھ دی اگوائی کیتی اے۔سرکاردے ایس فیصلے نال جگ ہنسائی ہوئی اے،سرکاراں کدے مسلک یاں مقامی لڑائیاں وچ نئیں پیندیاں۔ پیر نوں چن وکھائی نئیں دتا جاسکدا سی، ایس لئی عید دی بنیاد جھوٹھ اتے رکھ دتی گئی۔
شوکت یوسفزئی ،فوادچودھری نوں تنقید کردیا،آکھیا مفتی فواد اپنے کم نال کم رکھن سرکار تے علما نوں ٹارگٹ نہ بناون۔
فواد چودھری فیر اک ٹویٹ وچ آکھ دتا خیبر پختونخوا وچ چن ویکھن دی گواہی دین والےساریاں بندیاں اتے جھوٹھ دامقدمہ بناناچاہیدا اے۔