لکھاری،نعمان یاور
جد کوئی عجیب کم ہوجاوے یا کجھ مرضی دے خلاف ہوجاوے تاں فطری طورتے ذھن ایس نوں قبول نئیں کردا۔خیالی دنیا دی کہانیاں وچ کدھروں ان جان مخلوق آجاندی اے تے اوہ انساناں دی زندگی وچ کوئی چنگی تبدیلی لے آندی اے۔فیر اک دور آیاکہانیاں بدلن لگ گئیاں تے ایہو مخلوق آکے تنگ کرن تے تباہی مچان لگ گئی۔
اصل وچ ایہہ سبھ ذھن دی پیداوار ہوندی سی، ایس نوں جیہڑا چاہو روپ تے مطلب دے دیو، ایس مخلوق نے اوہو جیا بن جانا ہوندا اے۔ ایہدے پچھے انسانی سوچ چل رہی ہوندی اوہ کیہ چاہندی اے ؟ اوس دا مقصد کیہ اے۔ کیہ اوہ انسانان دی زندگیاں وچ بہتری لیان دے نال کجھ کرنا چاہندی اے۔ یاں فیر اپنے مقصد پورا کرن خاطر انساناں نوں استعمال کرناایاوس کا مقصد اے۔
کدے کدے اجیہی کہانیاں دے چنگے برے ہوون دافیصلہ اوس دے نتیجے اتے چھڈدتا جاندا اے، فیر اوس نوں اپنی مرضی مطابق ہر کوئی مطلب کڈلیندا اے۔ کسے نوں اک کہانی بوہو چنگی تے سوہنی لگدی اے جدکے کوئی ہور ایس نوں بھیڑا تے خوفناک جان دا تے ایس نوں برداشت وی نئیں کردا۔
خلائی مخلوق دا تصور پیش کرن دی آخر لوڑ کیوں پئی، شاید ایس لئی کہ اسیں اپنے آل دوال دے کرداراں دے فیدے تے کسے حدتیک صلاحیت تے قابلیت توں زیادہ مطمئن نئیں رہے۔ سانوں کسے اجیہی مخلوق دی لوڑمحسوس ہوون لگی جیہڑی ساڈے وچوں نہ ہووے یا کوئی بڑا اعلیٰ خصلتاں والا ہووے۔ جس دا مقابلہ کوئی نہ کرسکدا ہووے تے کوئی اوس نوں شکست نہ دے سکدا ہو۔
کدے وچ انج وی ہوندا سی بال اپنی لڑائی دوران ابے والد دی تڑی لادیندے سن میں اپنے پیو نوں لے کے آواں گا۔ اوس دے ذھن وچ اپنے دفاع لئی اک مخلوق ہوندی سی۔
انج ای ہر کسے نے دوجے نال مقابلے لئی کوئی ڈراوا پال رکھیا ہوندا سی۔ ایتھوں تیک کہ وڈیاں نیں ذھنی تسلی لئی کوئی اجیہا آسرا رکھیا ہوندا سی۔ ایہہ انسانی فطرت اے اوہ کسے دی پشت اتے کھلوکے یاں فیر اپنی کنڈھ اتے کسے نوں کھلار کے اپنی طاقت بناندااے۔ اصل وچ ایہہ طاقت ای اوہدے لئی مخلوق بن جاندی اے جیہڑے مشکل وچ اوہدے نال کھلوتی ہوندی اے۔ اک اجیہا ویلا وی آوندا اے انسان آپ نوں اک طاقت دے گھیرے وچ محسوس کرن لگدا اے اوس نوں کسے ہور سہارے دی لوڑنئیں ہوندی۔ تے اوہ کسے حد تیک مخلوق اتے آسرا چھڈدیندا اے۔ ایس موقعے اتے کدے ایس انسان نوں مضبوط کرن تے نڈر بناون والی مخلوق اوسے اگے آن کھڑی ہوندی اے۔ ایتھے فیر دشمن دا دشمن دوست تے میرے نال کون ،مخالف کون، دی نویں صورتحال پیدا ہوجاندی اے۔ ایس موقعے اتے اپنی طاقت فیر توں کٹھی کرن لئی اوہ انسان مڑ توں سجے کھبے ہتھ پیر ماردا اے۔ اوہنو اوہی آسرا ہن دشمن لگدااے تے اوہ اپنے خلاف ان جان قوت قرار دتا جاندا اے ۔ فیر اوس خلائی مخلوق نال مقابلے دی تیاری شروع ہوجاندی اے۔
اک نواں بیانیہ پیش کیتا جاندا اے کہ دنیا نوں شیطانی طاقتاں توں بچاون لئی سپر ہیرو خلائی مخلوق نال لڑن دی تیاری کررہیا اے۔ ایس جنگ وچ نویں صفاں بننیا شروع ہوجاندیاں نیں۔ دشمن نال کھلوجاندے نیں ساتھ دین والے مخالفاں نال کھلوتے ہوندے نیں۔ پر خلائی مخلوق دا کردار اوہو ی ہوندااے۔
اوس نوں شکست صرف اک طریقے نال دتی جاسکدی اے،جدتسیں اپنے دشمن گھٹ کرو، دوست زیادہ بناؤ،آل دوال مخالف زیادہ ہوون گے تاں فیر اک نئیں کئی خلائی مخلوقاں وکھائی دیون لگن گئیاں۔ فیر مقابلہ مشکل وی سگوں ناممکن ہوجاوے گا۔اوس دا ڈر کڈھن لئی بڑاآسان ٹوٹکا اے، اپنے سجے کھبے مخالف گھٹ کردیو تسیں پہلاں توں ودھ مضبوط تے طاقتور ہوجاوگے،فیر شاید خلائی مخلوق وکھائی نہ دیوے یا اوس دی سوچ وی ذھن توں نکل جاوے۔
