لہور (سجن رپورٹ) سرکاری ہسپتالاں دی نجکاری خلاف جاری ینگ ڈاکٹرز دا احتجاج ملک دے کئی شہراں وچ پھیل گیا۔ ڈاکٹراں نے اَج پشاور وچ لیڈی ریڈنگ ہسپتال دی او پی ڈی زورا زوری بند کرا دِتی۔ لہور، راولپنڈی تے فیصل آباد دے سرکاری ہسپتالاں وچ وی آؤٹ ڈور مریضاں دی سہولت ڈاکٹراں دے کم نہ کرن پاروں بند رہی۔ لہور دے پی آئی سی، شیخ زید ہسپتال تے چلڈرن ہسپتال دی او پی ڈی وچ کوئی کم نہیں ہوئیا۔ راولپنڈی چ بینظیر شہید، ہولی فیملی تے ڈی ایچ کیو ہسپتالاں دی او پی ڈی بند رہی۔ ملتان چ نشتر ہسپتال، فیصل آباد وچ الائیڈ ہسپتال، سول ہسپتال سَنے سارے سرکاری ہسپتالاں وچ او پی ڈی بند رہی۔ پشاور وچ ینگ ڈاکٹرز نے صوبے دے دوجے شہراں توں آئے ہڑتالی ڈاکٹراں نال رَل کے دھرنا دتا۔ بعدوں صوبائی سرکار نے ڈاکٹراں نال مذاکرات لئی کمیٹی بنا دتی تے ڈاکٹراں نے دھرنا ختم کر دتا۔ پختونخوا وچ ڈاکٹراں الزام لایا کہ اوہناں نوں ڈومیسائل دی بنیاد تے زبردستی مستقل رہائشی ضلعیاں وچ ترانسفر کیتا جا رہیائے، ڈاکٹراں نوں ایس منصوبے تے ڈاڈھا اعتراض اے۔ پنجاب وچ ینگ ڈاکٹرز دی تنظیم دا کہنا اے کہ “میڈیکل ٹیچنگ انسٹیٹیوشنز ایکٹ” کالا قانون اے جیہدا مقصد صحت دے شعبے چ کم کرن آلے پیشہ ور کارکنان نوں بے روزگار کرنا تے عوام کولوں مفت علاج دی رہی سہی سہولت کھونا اے۔
390
