تہاڈا ویلا مُک گیا، پی ٹی ایم آگواں نوں فوج دی وارننگ

فوج دے بلیار میجر جنرل آصف غفورمیڈیا نال گل کردیا، پشتون تحفظ موومنٹ (پی ٹی ایم) دے آگواں نوں خبردارکیتا تے آکھیا ہن وقت ختم ہوگیا، نال ای اوہناں توں پنج سوال پچھے جنہاں دے جواب قنونی دائرے وچ رہ کے منگن دا اعلان وی کیتا۔ ڈائریکٹر جنرل آئی ایس پی آرمیجر جنرل آصف غفور ملک دی سیکیورٹی صورتحال، پاک بھارت کھچا، پشتون تحفظ موومنٹ، مدرسیاں، بنگلا دیش تے دوجے معاملیاں اتے گل کیتی۔
پشتون تحفظ موومنٹ(پی ٹی ایم) بارے اوہناں آکھیا کہ جد ایہہ موومنٹ شروع ہوئی تے سبھ توں پہلاں اوہناں نال گل ہوئی اوس ویلے وی آرمی چیف آکھیا سی، اینہاں اتے سخت ہتھ نئیں رکھنا، کیوں جے ایہہ اجیہے جواناں دی گل کررہے نیں جنہاں جنگ ویکھی اے۔
میجر جنرل آصف غفورآکھنا سی، پی ٹی ایم والیاں نال ملے تاں محسن داوڑ اگلے دیہاڑ آپ ای اپنی تن منگاں دا اعلان کردتا
میجر جنرل آصف غفورآکھیا ٹی ٹی پی امیر مفتی نور ولی اے،پی ٹی ایم تے تحریک طالبان پاکستان اک چیز اے۔اوہ پی ٹی ایم دے حق وچ بیان کیوں دیندی اے؟ ٹی ٹی پی خلاف فوج آپریشن کیتے، ایس دوران کئی شہری تے فوجی جوان شہید تے پھٹڑ ہوئے اوہناں دا تے پی ٹی ایم دابیانیہ اک کیویں بنندا اے؟
ڈی جی آئی ایس پی آرآکھیا پشتون تحفظ موومنت ریاست پاکستان داحصہ اے یاں افغانستان دا،پاکستان دی پالیسی اتے چلن گے یاں افغانستان دی پالیسی اتے۔
بلیار پاک فوج آکھیا ہر کم قانونی طریقے نال ہووے گا، پی ٹی ایم جنی آزادی لینی سی لے لئی، پشتون تحفظ موومنٹ گواچے بندیاں دی لسٹ دتی سی۔اوہناں آکھیا پہلاں افغانستان وچ ٹی ٹی پی دے بندیاں دی لسٹ دتی جاوے اوہدے مگروں دساں گے باقی گواچے لوک کتھے نیں۔