چیف جسٹس آصف سعید کھوسہ اسلام آباد وچ ماڈل کورٹس دے حوالے نال تقریب نال گل کردیاں آکھیا، اج کل ہرپاسے توں چنگی خبر نئیں آرہی، جیہڑی آوندی اے اوہ وی مایوس کردی اے۔معیشت بارے سن دے آں کہ اوہ آئی سی یو وچ اے یاں فیر آئی سی یو توں باہر آرہی اے، ایس دا ذمہ دار کون اے ایہہ وکھری بحث اے۔
پارلیمنٹ اندروں وی شور سنائی دیندا اے، اوتھے وزیراعظم تے اپوزیشن لیڈر نوں وی بولن نئیں دتا جاندا۔
ایہہ صورتحال سانوں مایوس کردی اے، ٹی وی چینل بدل کے کرکٹ ورلڈکپ ویکھ دے آں بدقسمتی نال اوتھے وی بھیڑی خبر ہوندی اے۔
چیف جسٹس آکھیا ڈاھڈی خوشی نال کہہ رہیا آں پئی معاشرے دا اک کھیتر اجیہا اے جتھوں چنگی خبر اں آرہیاں نیں۔ ریاست دے وڈے تھم ہوون دی حیثیت نال اسیں انصاف دے رہے آں،ایہہ ساڈی (عدلیہ) دی آئینی ذمہ داری اے کہ فوری تے سستا انصاف دیئے۔
اوہناں آکھیا اسیں ماڈل کورٹس دانظریہ دتا، ایس دامقصد مقدمے اگے پائے جاون دے سارے کارن مکانا سی۔
چیف جسٹس آصف سعید کھوسہ آکھیا،اک ہور چنگی خبر اے عدلیہ 21 ویں صدی وچ ٹیکنالوجی دی مدد نال داخل ہورہی ہے، پاکستان دنیا اکو ملک اے جتھے مقدمے آن لائن سنے جاندے نیں۔
آصف سعید کھوسہ آکھیا ٹبر دا کلا کماون والا جیل گیا ہووے تاں اوہدی زنانی دا کمائی دا کوئی ذریع نئیں ہوندا، قیدیاں دے بچے بھی ایس دی سزا کٹ رہے ہوندے نیں۔
373
