چوہدری نثار 35 ورھے مگروں ن لیگ چھڈدتی

ٹیکسلا،سابق وزیر داخلہ تے وڈکے سیاست دان چوہدری نثار علی خان نے پاکستان مسلم لیگ (ن) نال اپنا تعلق ختم کردتا، اوہناں 35 ورھیاں مگروں پارٹی نال اپنیاں راہواں وکھریاں کرن دا اعلان کردتا۔ واہ کینٹ وچ اک پریس کانفرنس دوران اوہناں آکھیا پئی اوہ اگے توں مسلم لیگ (ن) دا حصہ نہیں رہن گے۔
چوہدری نثار علی خان دسیا پئی اوہناں اپنے ضمیر مطابق ایہہ فیصلہ کیتا، اوہ آپ نوں ویچنے نئیں لاسکدے، اوہناں ہمیش عزت لیے سیاست کیتی اقتدار لیے نئیں۔
اوہناں آکھیا، نون لیگ دے کئی سینئر رہنماؤاں نال گوڑے تعلق سن ایس دے باوجود کئی وار پہلاں وی کہہ چکے نہیں پئی اور نوں لیگ دا حصہ ہور نئیں بنن گے۔
اوہناں گلہ کیتا پئی کجھ سینئر آگواں نال اوہناں دے اختلاف تے معاملے چل رہے سن پر افسوس نال کسے نیں اوہناں حل نئیں کیتا۔
چودھری نثار آکھیا پئی ملک نوں مختلف محاذاں اتے کمزور کرن لیے اوہدے خلاف سازش کیتی جارہی اے۔
اوہناں ملک وچ جاری سیاسی اتھل پتھل دی ذمے واری اپوزیشن تے حکومت اتے تھپی اے۔
چوہدری نثار علی خان پاکستان تحریک انصاف سرکار دی کارکزاری اتے سوال چکے تے آکھیا کہ اینہاں کول کوئی پالیسی نئِیں جیہدے نال مسئلے حل کیتے جاسکدے، تے کیویں غریب نوں ریلیف دتا جاسکدا اے۔