ماں بولی وچ تعلیم ،صوبیاں نوں اختیار مل گیا

لہور، سجن رپورٹ،،
نیشنل کریکولم کونسل نے اتفاق نال اک سانجھے نصاب دے مسودہ تیار کرن دی منظوری دے دتی، جیہدے وچ صوبیاں نوں سکولاں وچ ماں بولی دی تعلیم دین سنے دوجے اختیار دے دتا۔ اسلام آباد وچ تعلیم دی وزارت دے صلاح کار جاوید جبار دی اگوائی ہیٹھ اجلاس ہویا، جیہدے وچ سول سوسائٹی، چارے صوبیاں، گلگت بلتستان، وڈے تعلیمی اداریاں دے نمائندیاں حصہ پایا۔ این سی سی نے پہلی توں بارہویں جماعت تیک اکو نصاب دے مسودے اتے گل بات کیتی۔ ڈان نال گل کردیاں جاوید جبار دسیا کہ ایہہ تجویز دتی گئی کہ انگریزی نوں سائنس تے ٹیکنیکل مضموناں لئی پہلی جماعت توں لازمی قرار دتا جاوے۔
پہلے مسودے وچ ماں بولیاں نوں کجھ سول سوسائٹی تے دوجے حلقیاں ولوں اختلاف کیتا گیا جیہدے کارن اوس نوں مسودے وچ نئیں رکھیا گیا سی۔ اوہناں پہلی توں پنجویں جماعت تیک ماں بولی وچ تعلیم دیوں دی مخالفت کیتی دسیا جاندا اے پئی ایس مسودے دی خامیاں دور کردتی گئیاں ۔کونسل دے اجلاس وچ شریک پیٹر جیکب نے دسیا اسلامیات دے نال دوجے مذہباں دی تعلیم دتی جاوے، دوجا مسودہ تن دناں وچ تیار کرلیا جاوے گا۔31 مارچ تیک ایس نوں اخیرلی منظوری دے دتی جاوے گی۔
پنجاب لوک سنگت دے کنوینر امجد سلیم منہاس نے آکھیا کہ اییہہ چنگی اے صوبیاں نوں اختیار دے دتا گیا پئی اوہ کیہڑے زبان وچ تعلیم دینا چاہندے نیں۔