عمران نوں گھروں گرفتار کراں گے، مولانا خلاف عدالت جاون دا فیصلہ

آزادی مارچ کرن والی اپوزیشن جماعتاں دی رہبر کمیٹی نال مذاکرات مگروں حکومتی کمیٹی نے پریس کانفرنس کیتی ، جیہدے وچ راکھی دے وزیر پرویز خٹک دا آکھنا سی، کہ آزادی مارچ کرن والی جماعتاں نوں انتظامیہ نال کیتے معاہدے اتے پکیاں رہن دی لوڑ اے، اوہناں نوں کسے وی خلاف ورزی اتے قنونی کارروائی دا سامنا ہووے گا۔ اوہناں دا کہنا سی، تقریراں دوران لیڈراں دا لہجہ چنگا نئیں سی خاص کر مولانا دا ایہہ آکھنا کہ ایہہ مجمع وزیراعظم نوں اوہناں دے گھر توں جاکے گرفتار کرلے گا۔ پرویزخٹک دا کہنا سی اوہناں دی پارٹی فیصلہ کیتا اے کہ ایس بیان اتے مولانا فضل الرحمان خلاف پیر والے دیہاڑ عدالت وچ درخاست دتی جاوے گی، کیوں جے ایسراں اوہناں نے لوکاں نوں وزیراعظم خلاف بھڑکاون تے بغاوت اتے اکساون دی کوشش کیتی اے۔