امریکی فوج دے افغانستان چھڈن مگروں کیہ حالات ہوون گے؟

(آسلام آباد سجن ڈیسک 20 جون ) افغانستان توں بدیسی فوجاں دے ٹر جاون مگروں جنگ نال ستیاناس مارے افغانستان دے مستقبل بارے افغانستان دے اندر تے عالمی پدھر اتے ا یہ خطرہ تلوار وانگوں لٹکیا نظری آ رہیا اے کہ اک واری فیر افغانستان وچ نوے جئے حالات پیدا ہو سکدے نیں ؟
کیہ اک واری فیرافغانستان وچ خانہ جنگی شروع ہو سکدی اے ؟ کیہ اک واری فیر افغانستان وچ 20 ورھیا وچ جو ترقیاتی کم کیتے گئے نیں، اوہ سارے تباہ ہوسکدے نیں ؟ کیہ امن خراب ھوون دی وجا توں افغانستان توں اک واری فیروڈی گنتری نال لوکاں دی آواجاوی ہو سکدی اے، تے اجیئے حالات وچ پاکستان تے گواھنڈی ملکاں اتے یاں اس سارے خطے وچ کیہ مل تارناں پوے گا
ایہ بے یقینی وی سر چڑہ کی بول رھئی اے کہ بدیسی طاقتاں دے ٹر جاون مگروں افغانستان وچ کرسی نوں کون مل مارسی ، کیہ طالبان تے افغان سرکار سمجھ بجھ نال ماملے حل کرلین گے یاایہ فیر آپسی وچ لڑن پھڑن دے آرے لگ جاسن ؟
ماضی دیاں مثالاں ساھمنے نیں جد روس افغانستان چھڈیا ، افغانستان دے حالات ہتھوں نکل گئے سن تے ملک دے انفرا سٹرکچر دا بیڑا غرق ھو گیا سی ۔
امریکہ دے صدر جو بائیڈن نے ترکی دے صدر نال گٹھ جوڑ تے پٹے چاڑھن دی جھد کیتی کہ پئی ترکی نیٹوفوجاں دا اک اہم حصا اے ہے تے ترکی دے صدر نے کابل ایئر پورٹ دی سیکیورٹی لئی اپنیاں فورسزاوتھے رکھن دی تجویز دتی اے۔
افغا نی طالبان ترکی دی اس تجویز نوں قبولن توں انکاری نیں تے آکھیا اے کہ افغانستان دی اک اک انچ دی راکھی افغان آپوں کرن گے