آمریت دا دور لیا جارہیا اے، مقابلہ کرنا ہووے گا، بلاول

عدلیہ تے میڈیا دی آزادی، لوکاں دی نمائندگی تیک جمہوریت نئیں آسکدی

ملتان: چیئرمین پی پی پی بلاول بھٹو نے کہا ہے کہ جے عدلیہ ذوالفقارعلی بھٹو نوں انصاف نئیں دے سکی، جیہدے بارے آپ من لیا پئی ایہہ قتل سی، فیر عام شہری نوں ملک وچ انصاف کیویں مل سکدا اے، اوہ ملتان بار نال گل کررہے سن، بلاول بھٹو دا آکھنا سی، اسیں اج تیک اڈیک وچ آں کہ شہید بے نظیر نو ں کدوں انصاف ملے گا۔
ڈکٹیٹر نے عدالتاں نوں اپنے کنٹرول وچ لیاندا، جیہدے پاروں انصاف نوں اک مخول بنا چھڈیا اے۔ نیب ورگے ادارے نوں سرکار دے فیدے لئی ورتیاں جاوندا اے، سب نوں اک نگاہ نال ویکھیا نئیں جاندا۔
نویں پاکستان دی جمہوریت وچ سیاسی انتقام دی کوئی تھاں نئیں ہونی چاہیدی، سابق صدر نوں اک وار فیر جیل گھل دتا گیا۔ سوال ایہہ وے کہ آصف زرداری ، پیپلزپارٹی لئی وکھرے قنون کیوں بنائے جاندے نیں۔ دسیا جاوے کہ جے کوئی الزام سندھ تے کراچی دا ہووے تے فیر مقدمہ پنڈی وچ کیویں ہورہیا اے۔
ذوالفقار بھٹو نے پنڈی وچ پھانسی دے کے شہید کیتا جاندا اے بے نظیر بھٹو نوں پنڈی دے لیاقت باغ وچ خودکش حملہ کرکے شہید کردتا جاندا اے، آصف زرداری نوں وی ایسے صورتحال دا سامنا اے۔
ملک وچ جدوں تیک جمہوریت نئیں ہووے گی، لوکاں دے سچے نمائندے نئیں ہوون گے، میڈیا لکھن وچ آزاد نئیں ہووے گی، عدلیہ انصاف نئیں دیوے گی، فیر کیویں مسئلے حل ہوون گے۔
کٹھ پتلی سرکار نوں ورت کے ڈکٹیٹرشپ دا دور واپس لیا گیا، اوہو ہتھکنڈے ورتے جارہے نیں، ایہناں دا مقابلہ کرکے ای جمہوریت نوں بچایا جاسکدا اے۔
تقریب وچ شریک کامیاں نے سرخ ہے سرخ ہے ایشیا سرخ ہے، بھٹو کے خون سے ایشیا سرخ ہے، لاٹھی گولی دی سرکار نہیں چلے گی، دے نعرے لا کے ماضی دی یاد دوادتی۔