آئین توڑنا کوئی مشکل نئیں

خصوصی عدالت دی سزا سناون مگروں سیاسی تے اپنے ولوں تگڑی قوتاں آمنے سامنے آگئیاں نیں، مقدمے دی مدعی سرکار مجرم نوں بچاون لئی کھلوگئی، بنیاد ایہہ بنائی کہ دوجے ملزماں نوں کیوں چھڈیا تے وڈے ملزم آئین توڑن والے نوں چھ ورھے سنوائی نئیں ہوئی۔
وڈے ملزماں نوں کدے سزا ملی وی نئیں، پرویز مشرف نے ملک دے دفاع لئی دو جنگاں لڑیاں، ویکھنا ہووے گا کہ جیہڑے الزام وچ سزا ملی اوہ کیہ سی، اوس 3 نومبر 2007 نوں آئین معطل نئیں کیتا سی۔ایس آئین نال وفاداری دی سونہہ چکی سی۔ آئیں دی دفعہ چھ کہندی اے کہ کوئی بندہ جیہڑا طاقت ورت کے یاں طاقت نال یا ں کسے ہور غیرآئینی طریقے نال آئین نوں ختم کرے یا اوس نوں معطل کرے یا اوس نوں منسوخ کرن دی سازش کرے تاں اوہ ڈاھڈی غداری دا مجرم ہووے گا۔
سبھ توں پہلاں اک فوجی آمر ایوب خان نے فاطمہ جناح نوں غدار آکھیا سی۔ 73 دے آئین پہلی دفعہ جنرل ضیا الحق نے 1977 وچ تروڑ دتا اوہ سنگین غداری دے مقدمے توں بچ گیا کیوں جے 1985 دی قومی اسمبلی نے ایس دستور توڑن نوں اٹھویں ترمیم راہیں تحفظ دتا۔ ایس آئین نوں پرویز مشرف 1999 وچ دوجی وار فیر توڑیا۔ اوہناں وی 2002 وچ قومی اسمبلی توں 17 ویں ترمیم دی چھتری اتے چاڑھ لئی۔ مشرف آئین نوں 2007 وچ معطل کردتا لیکن 2008 دی اسمبلی نے فیر دستور وچ تحفظ دے دتا۔ 2009 وچ سپریم کورٹ نے مشرف نوں غاصب آکھ کے اوہناں اتے بغاوت دا مقدمہ چلاون دا حکم دتا۔
اوس ویلے دے صدر آصف زرداری تے وزیراعظم یوسف رضا گیلانی ریاستی اداریاں وچ مفاہمت دی پالیسی اتے عمل کیتا، مشرف اتے مقدمہ چلاون دی تھاں اوہناں نوں پاکستان توں باہر جاون دتا، زرداری دی مفاہمت دی پالیسی ناکام رہی، میمو گیٹ اسکینڈل وچ زرداری نوں غدار قرار دتا گیا مگروں گیلانی نوں عدلیہ نے نااہل قرار دتا۔ 2013 دے الیکشن توں پہلاں مشرف پاکستان واپس آ گئے۔
آرمی چیف جنرل اشفاق پرویز کیانی کوشش کیتی مشرف واپس چلے جاون لیکن مشرف نے کیانی دی نہیں سنی۔ فیر نواز شریف وزیراعظم بن گئے اوہناں اپنی گل پوری کیتی تے مشرف اتے دستور توں غداری دا مقدمہ چلاون دا حکم دتا۔
نواز شریف اتے دباؤ پایا گیا کہ اوہ مشرف نوں باہر جاون دین، نئیں تاں ریاستی اداریاں وچ محاذ آرائی ودھے گی، نوازشریف وی ریاستی اداریاں نال میل ملاپ دے نام اتے مشرف نوں اک خاموش این آر او دے دتا، تے اوہ ملک توں باہر چلاگیا۔ ایہہ چپ چپیتے دتا این آراو وی کم ناں آیا تے سپریم کورٹ نے نواز شریف نوں وی نا اہل قرار دے دتا۔
2018 وچ عمران خان وزیراعظم بنے، اوہناں مشرف دے اک وکیل فروغ نسیم نوں وزیر قانون تے دوجے وکیل انور منصور خان نوں اٹارنی جنرل بنا دتا۔ اپوزیشن دے زمانے وچ مشرف دے مقدمے دی منگ کرن والے عمران خان وزیراعظم بنن مگروں مشرف نوں بچاون دا ٹل لا دتا اے۔ کارن ایہہ دسیا جاندا اے کہ دوجے ملزموں نوں شریک نئیں کیتا، جد کہ ایس طراں کورکمانڈر وی مقدمے وچ آجاون گے، جنہاں نوں پہلاں وی بچایاگیا۔
خصوصی عدالت بار بار مشرف نوں بیان ریکارڈ کران دا موقع دیندی رہی لیکن مشرف بیان ریکارڈ نہ کرایا، اخیر ساڈھے پنج ورھیاں وچ 125سنوائیاں مگروں خصوصی عدالت نے مشرف نوں موت دی سزا سنا دتی۔ سبھ جان دے نیں مشرف نوں سزائے موت نئیں ہو سکدی لیکن ایہہ اوہ سزا اے جیہڑی پاکستان وچ سنگین غداری دے ملزماں نوں پہلاں وی مل چکی اے۔ عمران خان سرکار کھل کے مشرف دی حمایت کر رہی اے۔ عمران خان دی کوشش ہووے گی کہ مشرف نوں بچایا جائے۔ ایسراں مدعی آپ ای مشرف دے حق وچ آجاوے گا۔ اپیل وچ جاون مگروں قانونی ماہراں مطابق مقدمہ مڑتوں کھل جاوے گا۔ اوہو گلاں ساہمن آون گئیاں۔ قوم اک وار فیر مقدمے دے سارے پہلوں ویکھن گے۔ آکھیا جاندا اے کہ عدالتی فیصلہ برقرار رہن دی صورت وچ سزائے موت نوں عمر قید وچ بدلن دی کوشش ہووے گی۔