لہور اتے چوتھا حملہ
ایہہ صدمہ سلطان جلال الدین فیروز شاہ خلجی دے ویلے آیا، اوس دور وچ مغلیہ لشکر تیمور نام دے اک امیر دے حکم اتے چغتائی خان حاکم لہور آیا، اوہناں دناں پنجاب وچ سوکھا قحط پیا سی، دشمن دی لٹ مار نے سارے خطے نوں اجاڑ کے رکھ دتا سی۔ ہزاراں پنڈ قصبے ویران پئے سن ، لہور شہر وچ وی ہنیر پیا سی۔ اپنی جان دے خوف توں لوکیں شہرچھڈ کے جارہے سن۔ سلطان شمس الدین التمش اوہناں دناں گجرات دی مہم وچ سی۔ جدے کارن اوہ پنجاب دی کوئی امداد نہ کرسکیا۔ دشمن نے رجھ کے ملک نوں لٹیا۔ جدوں شاہ نوں گجرات توں وہیل ملی تاں اوس دریائے ستلج اپڑ کے دشمن نال لڑائی کیتی، تاتاری فوج اوتھوں نسن اتے مجبور ہوگئی، تیمور فوج دا افسر پھڑیاگیا۔ کجھ چر قید وچ رہیا مڑ مسلمان ہوکے قید توں رہائی مل گئی۔ اوس نوں بادشاہ دے امیراں وچ شریک کرلیاگیا۔ ایس جنگ مگروں سلطان نے پنجاب دی بستیاں جیہڑیاں ویران تے اجڑگئیاں سن، اوہناں نوں مڑ توں وسایا، لہور دے وسنیکاں نوں مڑ توں بلاکے ایتھے وسایا۔ تاتاریاں توں جو کجھ لٹ مار وچ لبھیا سی اوہ رعایا وچ ونڈ دتا گیا۔ سرحد اتے وڈی فوج لادتی تے اجیہا بندوبست کیتا کہ اوس دے حیاتی وچ دشمن لہندے ولوں ہندوستان اتے حملہ آور نہ ہوسکے۔
لہور اتے پنجواں حملہ
پنجواں صدمہ سلطان محمد تغلق دے دور وچ آیا، بے شمار تاتاری فوج لہندے ولوں پنجاب وچ داخل ہوگئی۔ ایہدے دوران دیپالپور تے لہور دونویں شہر اجڑ گئے۔ پنجاب دے حاکماں بوہت کوشش کیتی کہ دشمن پنجاب توں نکل جائے۔ پر ایسراں نہ ہوسکیا اخیر سبھ نس کے دلی چلے گئے۔ مڑ تاتاریاں تسلی نال پورے ملک نوں لٹیا۔ شاہ دلی کول ڈھیر فوج سی پر اوہ کجھ نہ کرسکیا، اوس نوں ڈھیر ساری رقم جان چھڑان لئی دشمن نوں دینی پئی جیہدے مگروں اوہ سالم اپنے ملک ٹرگیا۔ جدوں تاتاری لشکر ملک توں نکل گیا۔ بادشاہ پنجاب وچ آیا رعایا دا وسا بناون دی کوشش کیتی، ملتان دے حاکم بہرام دی دھون لادتی اوس تے الزام سی اوس نے تاتاریاں نوں پنجاب آون دا اشارہ دتا سی۔
730
