383

آئی ایم ایف نال 6 ارب ڈالرقرض دا معاہدہ ہوگیا

لہور (سجن رپورٹ) پاکستان تے انٹرنیشنل مونیٹری فنڈ دے وچکار اسٹاف لیول مذاکرات وچ چھ ارب ڈالر دے قرضے دا معاہدہ ہو گیا اے۔ ہن آئی ایم ایف دا ایگزیکٹو بورڈ ایس معاہدے دے مسودے دی منظوری دے گا۔ پاکستان دے نویں وزیر خزانہ حفیظ شیخ نے سرکاری ٹی وی نال انٹرویو وچ ایہہ معاہدہ پاکستان ولوں طے ہوون دا اعلان کیتا۔ انٹرویو دے دوران ہی آئی ایم ایف ولوں وی معاہدے دے ڈرافٹ تے اتفاق رائے ہو جاون دی اطلاع دتی گئی۔ ہن تک سامنے آئی تفصیل دے مطابق آئی ایم ایف دے نال معاہدے دے تحت پاکستان اپنی کرنسی روپیہ دا امریکی ڈالر نال تعلق ختم کر دیوے گا تے پاکستان دی حکومت مختلف سبسڈیاں تقریبا” ختم کر دیوے گی، بجلی تے قدرتی گیس دی قیمت ودَھائی جاوے گی لیکن 300 یونٹ توں تھوڑی بجلی ورتن والیاں نوں بجلی دی قیمت تے کجھ سبسڈی ہن وی دتی جاوے گی۔
پاکستان دی وزارت خزانہ تے ہور سرکاری افسراں دی آئی ایم ایف نال رسمی گل بات تقریبا” پنج مہینے تک جاری رہی، ایس دوران ایم ایم ایف دی ٹیم دو واری پاکستان آئی تے پچھلے مہینے اسد عمر وی واشنگٹن وچ مذاکرات مگروں‌ دسیا پئی معاملات طے پاگئے نیں. تے مئی وچ۔آئی ایم ایف دا سٹاف اسلام آباد آ کے شرطاں تے عملدرآمد دا میکنزم طے کرے گا۔ امریکہ توں واپس آندیاں ہی اسد عمر نوں وزارت توں ہٹا دتا گیا تے سرکاری زریعاں ولوں دسیا گیا کہ اسد عمر دی معزولی آئی ایم ایف دے مشورے تے کیتی گئی اے کیوں جے آئی ایم ایف دے افس اسد عمر نوں تھوڑی اہلیت دا آدمی سمجھدے نیں۔ اسد عمر دے ہٹ جاون مگروں وزیر خزانہ حفیظ شیخ نوں بنایا گیا تے نال ہی اسٹیٹ بینک دے گورنر تے فیڈرل بورڈ آف ریونیو دے چیرمین نوں وی ہٹا کے نویں بندے لا دتے گئے۔ ایہناں تبدیلیاں دے بعد آئی ایم ایف دی مذاکراتی ٹیم نے اسلام آباد آ کے پاکستان دی تقریبا” نویں مذاکراتی ٹیم نال واشنگٹن وچ پہلاں طے ہوئیاں گلاں تے اتے کجھ نویں نکتیاں تے مذاکرات کیتے جیہدے نتیجے وچ اک معاہدہ طے ہو گیا لیکن فیر وزیراعظم عمران نیازی ولوں ایس طے ہو چکے معاہدے نوں مسترد کر دین دی خبر آئی تے ایہدے کجھ دیر بعد آئی ایم۔ایف دے زریعاں دت حوالے نال ایہہ اطلاع آئی کہ آئی ایم ایف ہیڈکوارٹرز ولوں طے شدہ معاملیاں تے کوئی نرمی نہ کرن دی ہدایت دتی گئی اے۔ فیر اج مذاکرات ہوئے تے انتہائی چھوٹے کنزیومرز لئی بجلی دی قیمت تے سبسڈی ختم نہ کرن دی تبدیلی نال اج حفیظ شیخ نے معاہدہ طے ہوون دا اعلان کر دتا۔ حفیظ شیخ دسیا کہ آئی ایم ایف دے نال قرضے دا معاہدہ ہو جاون دے بعد ورلڈ بینک تے ایشیائی ترقیاتی بینک وی پاکستان نوں دو توں ترے ارب ڈالر تک قرضے دیں گے۔ آئی ایم ایف دے اعلامیہ وچ دسیا گیا اے کہ پاکستان اپنے قرضیاں دا بھر گھٹاون لئی نویں ٹیکس لاوے گا۔

اپنی رائے دا اظہار کرو