وفاقی تحقیقاتی ادارے (ایف آئی اے)گوجرانوالہ وچ کارروائی کردیاں اک بھارتی شہری نوں پھڑلیا،ڈپٹی ڈائریکٹر ایف آئی اے عامر نوازدسیا کہ گرفتار ملزم پنچم تیواری بھارتی شہر بنارس دا رہن والا اے، اوہ 10 ورھے پہلاں غیر قنونی پاکستان وڑیا،اوس اک پاکستانی دوست دی مدد نال بلال دے نام توں جعلی پاکستانی شناختی کارڈ بنوایا سگوں پاکستانی کڑی نال ویاہ وی کرلیا، ملزم دی 2009 وچ گوجرانوالہ دے کامران نال دبئی وچ دوستی ہوئی ۔
اوس دا دعویٰ کہ کامران توں متاثر ہوکےہندو مذہب چھڈ کے اسلام قبول کرلیا، مذہب تبدیلی کارن اوہ بھارت واپس جاون توں ڈردا سی، پنچم تیواری دا کہنا اے کامران نے پاکستان رہن تے اپنی بہن نال ویاہ کران دی پیشکش کیتی، انسانی سمگلراں نے سمندر راہیں اوس نوں کراچی اپڑایا۔بھارتی شہری دسیا کہ کامران دے پھوپھے مسعود نے اپنا پتر ظاہر کر کے شناختی کارڈ بنوادتا ،نواں نام بلال رکھ دتا۔
ایف آئی اے حکام ملزم خلاف مقدمہ درج کر کے تحقیقات شروع کردتی، مقدمے وچ کامران سنے مدد کرن والے 5 بندے وی نامزد کیتے۔ بھارتی شہری پنچم تیواری داعدالت توں 5 دیہاڑریمانڈ حاصل کر لیا۔
336
