251

کورونا وائرس پاکستان اپڑ گیا، 2 بندیاں وچ تصدیق


ایران توں آون والے کراچی تے اسلام آباد دے دو شہریاں وچ کرونا وائرس دی تصدیق ہوون مگروں پاکستان سرکار نے من لیا پئی، ایہہ جان لیون والا وائرس ملک وچ آچکیا اے۔ بلوچستان دی تفتان سرحد اتے وی سکیننگ دا بندوبست کردتا گیا اے۔ بلوچستان سرکار نے احتیاط ورتدے ہویاں سکولاں تے دوجے تعلیمی اداریاں نوں 15 مارچ تیک بند کردتا اے۔
سندھ سرکار نے وی کراچی وچ خاص طور اتے ہسپتالاں وچ آئسولیشن وارڈ بنادتے نیں، ایران توں آون والے کرونا توں متاثر 22 ورھے دے جوان یحیی جعفری دے ٹبر والیاں دے وی ٹیسٹ کرالے گئے نیں۔
وزیراعلی سندھ مراد علی شاہ نے اچ پدھری بیٹھ سدی جیہدے وچ صورتحال دا جائزہ لیتا گیا، اک ٹاسک فورس بناون دا فیصلہ کیتا گیا۔
طبی ماہراں دا آکھنا اے پئی شہریاں نوں احتیاط ورتن دی لوڑ اے، مونہہ اتے ماسک پاکے باہر نکلن۔
کوئٹہ وچ وزیراعظم دے اچیچے صلاح کار ڈاکٹر ظفر مرزا پریس کانفرنس وچ دسیا پئی دوہاں مریضاں دی حالت تسلی جوگ اے، سرکار نے سارے ضروری بندوبست کرلے نیں۔

اپنی رائے دا اظہار کرو