395

کرکٹ ورلڈ کپ 2019 اَج توں شروع

لندن (سجن رپورٹ) 12واں آئی سی سی کرکٹ ورلڈ کپ 2019 اَج (جمعرات نوں) شروع ہو رہیائے، افتتاحی میچ انگلینڈ تے جنوبی افریقہ دِیاں ٹیماں وچکار اوول گراؤنڈ چ کھیڈیا جاسی۔ پاکستان آپنا پہلا میچ کل (جمعے نوں) ویسٹ انڈیز خلاف کھیڈے گا۔ ورلڈ کپ دی میزبانی انگلینڈ تے ویلز رَل کے کر رہے نیں جیہدے چ 10 ٹیماں حصہ لَے رہیاں نیں۔ ٹورنامنٹ 30 مئی توں 14 جولائی تائیں جاری رہسی تے ایہدے چ کُل 48 میچ کھیڈے جان گے۔ ساریاں ٹیماں دا اِک ہی گروپ بنایا گیائے، ہر ٹیم باقی دِیاں 9 ٹیماں نال اِک اِک میچ کھیڈسی تے پہلے نمبراں اَپر آؤن آلیاں چار ٹیماں سیمی فائنل کھیڈن گِیاں، فائنل لارڈز چ کھیڈیا جاوے گا۔ انگلینڈ تے ویلز چ ہوون آلا ایہہ 5واں کرکٹ ورلڈ کپ اے۔ کُل انعامی رقم 10 ملین ڈالر رکھی گئی اے، فائنل جتن آلی ٹیم نوں 4 ملین ڈالر تے فائنل ہارن آلی ٹیم نوں 2 ملین ڈالر جد کہ سیمی فائنل ہارنے آلی ٹیم نوں 8 لَکھ ڈالر انعام مِلسی۔ ہر لیگ میچ جتن والی ٹیم نوں 40 ہزار ڈالر تے سیمی فائنل تائیں نا اَپڑن آلیاں 6 ٹیماں نوں اِک اِک لَکھ ڈالر لَبھن گے۔

اپنی رائے دا اظہار کرو