دونوں ملکاں وچکار تعلقات دی نوعیت توں کون واقف نئیں، کرتارپور راہداری دا معاہدہ تے افتتاح اک اجیہے موقعے اتے ہورہیا اے جدوں پاکستان تے بھارت وچ کشیدگی دی انتہا اے۔
بھانویں دوہاں ملکاں وچ سفارتی تعلق قائم نیں، لیکن اسلام آباد تے نویں دلی وچ اک دوجے دی ہائی کمشنر موجود نئیں۔ ہائی کمشنرزدا نچلا عملہ سفارتی کم چلارہیا اے۔
دسن والی گل ایہہ اے پئی اجیہی صُورتحال پہلی وار پیدا ہوئی اے کہ دوہاں ملکاں درمیان ’’پوسٹل سروسز ‘‘ ڈاک بند اے۔ ایس نوں تن مہینے ہوون نوں نیں، کسے قسم دے خط، پتر، کاغذات، تے پوسٹل سروسز راہیں رابطہ قائم نئیں کیتا جاسکدا۔
یعنی عوامی سطح اتے دوہاں جانب دوستاں، عزیزاں تے رشتے داراں درمیان ایہہ سستا، اسان تے موثر رابطہ بند اے، دوناں ملکاں وچ تن جنگاں دوران وی پوسٹل سروس دا نظام کدے بند نئیں ہویا۔
دوجے پاسے سکھ برادری نوں کرتار پور وچ وڈی سہولت دتی جارہی اے، ایہہ راہ داری ، ہر موسم وچ پورا سال کھلی رہے گی ، زائرین لئی لنگر تے پرساد دے سارے ضروری انتظام پاکستان کرے گا۔ سروس چارجز دی مَد وچ زائرین فی کس 20 ڈالرز ادا کرن دے پابند ہوون گے۔
