وزیراعظم عمران خان دی اگوائی ہیٹھ وفاقی کابینہ دا ہنگامی ہویا جیہدے وچ آرمی چیف جنرل قمر جاوید باجوہ دی مدت ملازمت وچ توسیع دی سمری سبھاں دی صلاح نال منظور کرلئی گئی۔
ذرائع دسدے نیں کہ وزیراعظم دی ہدایت اتے آرمی چیف دی ملازمت وچ وادھے دی سمری وزیراں ساہمنے پیش کیتی گئی جنہوں اوہناں اتفاق نال منظور کرلیا۔
کابینہ ڈیفنس ایکٹ وچ ترمیم دی منظوری وی دتی، ایہدے تحت ڈیفنس ایکٹ وچ لفظ ایکسٹینشن دااضافہ کیتا گیا اے تے جیہدے مگروں آرمی چیف ملازمت دی مدت ودھان دی نویں سمری تیار کیتی گئی جنہوں وزیراں اگے پیش کیتا گیا۔
وفاقی کابینہ دی منظوری مگروں ایہہ نویں سمری صدر مملکت نوں گھل دتی گئی، ذرائع دا کہنا اے کہ وفاقی کابینہ نے آرمی چیف دی توسیع دا پہلا نوٹیفکیشن واپس لے لیا، جیہڑا 19 اگست نوں وزیراعظم دے دستخط نال جاری ہویا سی۔
ذرائع نے دسیا کہ کابینہ دا اجلاس شروع ہوندے ای، وزیراعظم عمران خان نے سپریم کورٹ ولوں نوٹی فکیشن معطل ہون اتے ڈاھڈا غصہ کیتا تے وزیر قانون فروغ نسیم اتے رجھ کے بولے۔ عمران خان نے کہیا کہ جد آرمی چیف دی توسیع دا معاملہ طے ہوگیا سی تاں ایس دے سرے تقاضے پورے کیوں نہیں کیتے گئے، وزارت قانون نے غفلت کیوں ورتی تے سارے قانونی نکتے پورے کیوں نہیں ہوئے؟
کابینہ اجلاس مگروں وفاقی وزیر تعلیم شفقت محمود، وزیر ریلوے شیخ رشید تے وزیراعظم دے معاون خصوصی احتساب شہزاد اکبر پریس کانفرنس کیتی۔
شیخ رشید دسیا کہ وزیر قانون سینیٹر فروغ نسیم نے اپنے عہدے توں استعفیٰ دے دتا اے ، اوہ بدھ نوں سپریم کورٹ وچ آرمی چیف جنرل قمر جاوید دا کیس لڑن گے۔
351
