ڈالر لکاون والیاں دے خلاف آپریشن

اسلام آباد( سجن رپورٹ) وفاقی حکومت ڈالر دا مل قابو وچ رکھن لئی ڈالر لکا کے رکھن والیاں تے افواہواں گھڑن والیاں دے خلاف پریشن چھو دتا اے۔
وفاقی وزیر اطلاعات چودھری فواد نے اپنے ٹویٹ سنہیے راہیں دسیا اے بئی ڈالر لکاون والیاں دے خلاف آپریشن ایف آئی اے، سٹیٹ بنک تے وزارت خزانہ رل کے کر رہئے نیں۔ ایس توں پہلاں خزانے دے وزیر اسد عمر نے پریس کانفرنس کر کے آکھیا سی بئی ڈالر دا مل ہور نہیں ودھے گا تے لوکاں نوں ایس بارے افواہواں اتے دھیان نہیں دینا چاہیدا۔ اوہناں دسیا بئی آئی ایم ایف نے روپئے دا مل گھٹاون لئی کوئی دبا نہیں پایا تے نہ ای روپیہ اپنے اصل مل نالوں ودھ مل تے وک رہیا اے۔ اوہناں آکھیا بئی جے افواہواں گھڑن والیاں نے اپنا کم نہ چھڈیا تے اوہناں دے خلاف قانون نوں حرکت دتی جاوے گی۔
اوہناں لوکاں نوں صلاح دتی بئی اوہ ڈالرمل لین دی تھاں سٹاک ایکسچینج تے زمیناں وچ سرمایہ کاری کرن کیونجو تھوڑے چر مگروں پاکستان وچ حالات چنگے ہو جاون گے۔ اوہناں اکھیا بئی پی ٹی آئی دی سرکار نے پچھلیاں سرکاراں نالوں گھٹ مہنگائی کیتی تے ملک دی معیشت چھیتی چنگی بھلی ہو جاوے گی۔
اوہناں آکھیا پچھلے وزیر خزانہ کوڑ بول دے پئے نیں تے اوہناں دے ویلے معیشت دا بیڑہ غرق ہویا سی جس نوں نویں سرکار آہر کر کے بہتر کر رہئی اے۔
ملک وچ روپئے دے مل وچ اودوں گھٹا شروع ہو گیا سی جدوں وزیر اعظم دے صلاح کار رزاق داؤد نے آکھیا سی بئی پاکستان کنگلا ہو گیا اے تے دوجے پاسے خزانے دے وزیر آکھ رہئے سن بئی سرکار کول دی ای راہوں نیں اک تے ایہہ اے بئی آئی ایم ایف کول جا کے قرضہ منگئے تے دوجا راہ قرضے موڑن توں اکا مکر جاون دا اے۔
دوجے بنے خزانے دے اک افسر دسیا سی بئی پاکستان نوں قرضہ آئی ایم ایف نے تاں دینے اے جے پاکستان ایف اے ٹی ایف دیاں ساریاں شرطاں پوریاں کرے گا۔ پاکستان نوں ایف اے ٹی ایف نے آکھیا ہوئیا اے بئی اوہ دہشت گرداں دے ٹکانیاں دے خلاف کارروائی کرے تے دہشت گردی لئی ورتے جاون والے اکاؤنٹ پھڑے۔